Жулва «Илчи» кказитрал буккултран оьрмулуву аьркин шайсса иширттая, дукралия, ххяххиярттая, дарувсса урттуя ва цаймигу затирттая чIявуну чичай. Хъинни, лайкьри. Цанчирча, оьрмулул хъуниминнан кIулнугу, цIанасса жагьилминнал мукун «мюрщисса» затирттах къулагъас къадайхха.
Амма иш багьну, аьркин хьуний, хъап-шап тIун, хъирив буклангур багьайсса. Бусравсса учитель, «Илчилулгу» муданасса дус, чIарав ацIу, кумагчи, хъинну лакку мазгу ххирасса ЧIарттал МахIаммад Макьсудовичлулгу уттигъанну кказитрай чивчуну бия тамансса лакку дукрардая. Ва ттула дуснайнгу барчаллагь тIий, ттунгу чичин ччай бур жула Ккуллал хьхьичIарасса, уттигу, ирсирай най, хъамакъадитлатисса, хIакьину цанналуссагу, аьмссагу дукрардая.

Учин бюхъайхха, кIайгу лак бакъарив, Ккуллал цанналу ляличIисса дукрарду диркIссарив ягу дуссарив, куну. Ва суалданун кутIану жаваб дуллай, учивияв, дуссар, диркIссар, куну. Цанчирча буккултрангу бавхьунссар «Ккуллал дукьрахIан», «Ккуллал къячIив» ва цаймигу дукрардая ва хIачIиялиясса бусала, хаварду.
Мяйжаннугу, махъсса шиннардийнин ялув кIицI дурсса къячIив ва дукьрахIан махъсса шяраваллаву, Лакрал ва цаймигу лагма районнайгума «Ккуллал» тIий сийлий дикIайва, Хъусращиял, ТIаннул ЦIувкIуллал, Буршиял ва цайминналгу дувайсса дуна. Масала, 40-50-ку шиннардийнин тIиний кунна, Ккулув личIи-личIисса дарувсса урттуя чяй дайва анжагъ къатлуву цу-унугу къашавай хьусса чIумал. Шиккува кIицI бан, бунагьирттал аьпа баннав цал, ххаллилсса ккуличу, хъуначу Чупалав Оьмаров, на хьунаавкьутари, буслан икIайссия, ай, чIаххучу, уссия дакI хъинсса вил буттал ппу Саймал ХIасан. Гъумук нукарну уну, шавай учIайхту, чара бакъа цIуххайссия, къашавай цу ур шяраву куну. Нагу бусайссия. Яла зана хьуну шавайн, ларсун чяйлул дурцIусса чIурлил чяйник ва качаргу, гай къашайшалтрачIан ияйва, бусайва гайннал дакI хьунмургу. Ургу ина гайннал ганахьсса барчаллагьирттах (!)…
Укун чяй дарувран хIачIаван тIий, сайки гьарцаннал къатраву, гъинттул-ссуттил дартIун, кьакьан дурну дикIайссия личIи-личIисса уртту (сувра, ттуккулцIу, нацIу мархха, м.ц.). Уттирив иш личIину бур, чяй дарувран тIий къахIачIай.
Ихтилат ппухълунная ирсирай нанисса дукрардая бухьувкун, кIицI бан, сайки гьарца шяраваллилгу цанна-цанна ххирасса дукрарду дикIайссия. Масала, ЦIущуллал – чяй, ЧIяйннал – нугъай чяй, Вихьуллал – кьурчIиссаннухун ини, хъюрув, Хъусращиял – оьрус нувщи. Укунна – махъми шяраваллилгу.
Ча, нагу кIицI данна, ттуннагу ххирасса, жула Ккуллал дукрарду ва хIачIия. Вайннул цIардугу Ккуллал цалла зумувну учайсса куццуй чичинна.

Дукрарду
ХхункIру (лачIал, шагьнал лачIал, хъюруврал иникьаллул, инил (даруврансса), був­цIуххункIру (дикIул, нисирал, нувщул, ккунукрал, личIи-личIисса даруврансса урттул), нагьливу ххункIру, хIухчил хъуни ххункIру, накь, хъурунхъусса, ккурч, дахъни, щайини, аьрччап, ччатI (кIарттул, курукрай, гъунттуй, чарай бувсса кIюлаччатI, гургри, буркив, шархь нис, чутту, далгу, къурнил нувщи, цIарайх дикI, гъюгъукру (цIараву, пачливу ккирттавува шавхьсса нувщи), дурцIудикI (ккурккимай, цIуму, хъата…), пак, майлухсса, маз-къюкI (кьакьан дурсса), рассук, бакI-щикI, гьутру-ттиликI, кьак, сумлу, кIут, бюру, куни, улчча, нагьлиини, хIалахIу, лавхъини, мажлис, хьюмунис, мюршнис, гъадарттул нис, щивщу, хъюрув, зиниччатI, ххюнтIукув, гугут, ашу, уцуми, шай, някIунна, оьрчIикIури м.ц.

ХIачIия
ДукьрахIан, кици, мачча, накI, тартнакI, дирщунакI, жит, кьурчIисса (ццихькусса жит), ахъул­ссаннул щин, хаснува бурувссаннул щин. Амма Ккуллал цIанасса дукрардаву, цимил дарчагу чунчу къачайсса, хIакьинусса кьинигу шагьрурдайминнангума бусравнувассар ххункIру ва буркив, къячIив, чутту, дукьрахIан, щайини, аьрччап ва цаппара цаймигу аруххалун, хъамаллурангу цал-цал дувайсса, дувангу захIматсса, харжигу бу­ккайсса дукрардур. Лях-лях укунна аруххуттан куннари дувайсса хъурунхъусса, ккурч, ини, нагьлил ини, нагьливу ххункIру. Чутту чIявуну хъуру дугьай чIумал гъайтIалан хIурматран байсса бивкIссар.
Махъсса шиннардий цаппараннал бизнес дуллай бур къячIив, куннал – дукрахIангу. Къаччан мабикIарача, вайнначIа кувний «чудугу» тIий, къячIан кIанай дикIул буркив буллай бур. ДукьрахIанни тIийгу, чансса ццихьгу бусса, оьлур­ккусса щин дахлай бур. Бур, циванни кьюлтI бан. Ккул- Хъусращиян, Бурши-Ххюлуссаннан хъинну кIулссар дукьрахIан цукун дайссарив, ми цукунсса дикIан аьркинссарив. ЦIана хьхьичI куннасса дуллай бакъар. Мяйжаннугусса къячIив дайсса диркIссар, къамюрш дурну хIуен дурсса, гьарусса дикIуяча, сок личIаншиврул дагьралух, чIири рикIирах мюрш дурну, руртусса дикIуя. КъячIи дансса дикI хIадур дайсса диркIссар явш, иссиявт, чимус, чансса лаччигума бивчуну. КъячIи дуллалиний дикI, чансса хьхьирцIуну, кружкалувун, чIиви кIункIурдувун ссирча (кьурчIисса) ва цIугу бакьин бувну, личIину щаращи дурну хIадур дай­сса диркIссар къячIив шашаннин. Ми накь къячIавун руртIуну, канакиний, цал хьхьичI накь хIачIайссар. Ми накьлил нахIушиву бусан, «ва­ппабай, къячIул накьлияр нахIусса дур» чайсса бивкIссар, цамур накь хIачIайний.
Укунна дукьрахIангу, хъинну хъирив лавну, дувайсса диркIссар. Ванийн бувну, жулва ппухълунначIа лап сийлий диркIсса къячIив, чутту, дукьрахIан цила багьайкун дулларча хъина. Ванийну бизнесгу хъиннура гьаз хьунтIиссар, ми дукаймигу рязину личIавантIиссар. ЦIанакул кунма цIуру-кIуру къатIий.
Бюхъай на чивчумур личIину бувчIин, ттуйн къаччан бикIан цаппара къячIал, дукьрахIанттил бизнесчитуран. Тавакъюри ба­гъишла итаву ва чивчумур тIайлану бувчIаву.
«Илчилий» уттинингу чивчунни, чичлайнмагу бур лакку дукрардая. Уттигъанну РГВК-лий «Аьрщи ва агьлу» передачалийгу ккаккан дунни Ккулув цаппара мукунсса дук­рарду даву. Хъина. Амма му передача, хъинну хъирив лавну хIадур дурну дакъаяча, хъап-шаплий, ххина-ккина ккаккан дурна. ХIайп!
Ванийн бувну, цIанасса жагьилминнангу лахьхьин, хъуниминнангу дакIнийн бутан, жулва ппухълунначIа бусравну диркIсса хIакьсса лакку дукрарду даврил технологиялия «Илчилий» уттигу чичларча оьккину къахьунссия. Букканссар барчаллагь чинмигу.
Гьарун ХIасанов,
ш. МахIачкъала

Р.S. Бусияра зувагу, цукунсса дукрардая чивчуну ччай буссарив. Чичара зура ми дукрарду дайсса куц, цайминнангу кIулну бикIан.