Декабрьданул 28-нний Ккуллал райондалул администрациялул актовый залдануву хьунни ирглийсса Ккуллал райондалул депутатътурал мажлисрал сессия. Сессиялий, райондалул депутатътал бакъагу, гьуртту хъанай бия шяраваллал школардал директортал, идарарттал бакIчитал, жяматийсса ишккаккулт, Ккуллал райондалул бакIчи Сулайманов Сяид, ванал хъиривми ва отделлал каялувчитал.
2016-ку шиналсса райондалул бюджетран хас бувсса доклад бувна райондалул финансирттал управлениялул хъунама Амучиев Кьурбаннул.
Гьарта-гьарзасса ихтилат бувна, мукунма, райондалул бакIчинал. Ванал такну кIицI бувна налогру дулаврил давурттив кьунуцIун бияннин къадуллай, шинал лахъишиврий вайннуха къазий бушиву шяраваллал бакIчитал. Хьхьарану ларгшиву 2015-ку шинал баян бувну бивкIсса Литературалул шин. Я шяраваллал, я школардал библиотекарттал къадуршиву Литературалул шинан хас дурсса янилун дагьан куннасса вечер, дискуссия, чичултращалсса, шаэртуращалсса хьунабакьаву. Ххал бивгьуна райондалул оьрмулуцIун бавхIусса цаймигу масъалартту.
