Декабрьданул 26-нний Ваччав, Ккуллал райондалул муниципал сакиншиннарал актовый залданиву хьунни ирглийсса Ккуллал райондалул собраниялул депутатътурал сессия. Сессиялул ххал бигьин лавсъсса масъаларттал сияхI дия 15. Сессия бачин бувну ия Ккуллал райондалул собраниялул депутатътурал председатель ХIамзат Гуйдалаев.

Сессиялул давурттавух гьуртту хъанай бия депутатътал бакъассагу, Ккуллал райондалул муниципал сакиншиннарал хъунаманал хъиривми СалихI Сагидов, Эдуард ХIажиев, администрациялул отделлал хъуними, райондалул идарарттал каялувчитал, шяраваллал администрациярттал хъуними ва СМИ-рдал вакилтал. Сессиялул ххалбивгьуна укунсса масъалартту:
1.Ккуллал райондалул 9 зуруй биттур бувсса бюджетрая доклад бувуна финотделданул хъунаманал кIанайма Рамазанов Марислул.
2-4. Ккуллал район социальнайну ва экономикалул чулуха 2014-ку шинал ва хъиривсса кIира шинай хьхьичIуннай шаврил прогнозрая. 2014-ку шиналсса адресрай ккаккан дурсса инвестициялул программалия. 2014-ку шинал райондалий приватизация дувансса программалия докладру бувуна Ккуллал райондалул экономикалул комитетрал хъунама Оьмаров МахIаммадлул.
5. 2014-ку шинал бюджетрая доклад бувуна Рамазанов Марислул.
6. Муниципал сакиншиннарал ххуллурдал фондрая доклад бувуна Сагидов СалихIлул.
7. Терроризмалийн къарши­сса программалия доклад бувуна шяраваллал администрацияр­ттащалсса давурттал отделданул хъунама Ильясов Шамиллул
8-13.Цалий бавцIуну шяраваллал оьрму хьхьичIунмай хъананшиврул дуллан аьркинсса давурттал программалия, 2014-2020-ку шиннардий чIиримур ишбажаранчишиву хьхьичIуннай дувансса программалия, Единый налог дулайни ишла бувайсса К-2 тIисса коэффициентрая, аьрщараясса налог дулаврия, хъуслих дулайсса налогирттая, 2014-ку шинал райондалул дучIан дурсса къажанжилул администраторшиву дуван Ккуллал райондалул муниципал сакиншиннарахьхьун ихтияр дулаврия докладру бувуна Оьмаров МахIаммадлул.
14.Контрольно-счетный комиссиялул председательная доклад бувуна Гуйдалаев ХIамзатлул.
15 Ккуллал райондалул уставраву ххисса пунктру буван багьаврияту доклад бувуна Илиясов Шамиллул.
Сессиялий ххалбивгьусса циняв масъаларттан хасъсса хIукмурду кьамул бувуна. Анжагъ 2014-ку шиналсса бюджет цалчинмур кварталданий баххана хьун бюхъайсса буну тIий, цалчинмур буккаврин ккалли бувшиврун хIисав бувуна. Сессиялул даву хъинну ххуйну ларгуна. Му ххуйшиву ци дия учирча депутатътал ххал бигьлагьисса масъаларттавух хIала-гьурттуну цалами пикрирдугу буслай бия. Хъиннурасса гьур­ттушиву дуруна ЧIяйннал шяраваллил чулухасса депутатънал ХIамзаев Ширванинал.
Циняв сессиялий ххалбигьлай бивкIсса масъаларттавусса цифрарду кIицI къабарчагу, хъинну агьамсса сессиялий ххал бигьлай бивкIсса цаппара масъалартту кIицI буван ччива. Ккуллал райондалул хъунаманал цалчинма хъиривчунал Сагидов СалихIлул бувсса ххуллурдал фонд хIасул бавриятусса докладраву ванал кIицI бувуна шяраваллал вивсса ххуллурду бакьин буван ккаккан дурну душиву 11 миллиондалия лирчусса арцу. Мунийн бувну, шяраваллал администрациярттал анаварну цала шяраваллаву цими километра ххуллурдал дакьин дуван аьркинну буссарив схемарду дурну райондалул админимстрациялийн бучIан багьлай бусса бувсуна.
Адресрайсса, инвестициялул зумунусса программалийн бувну, 2014-ку шинал Ккуллал райондалий дуллансса давур­ттавун багьну бия:
1. Ваччавсса школа
2. Вихьливсса школа-интернат
3. ЧIяйннал шяравусса спортзал
4. Хъюйннал лувсса, Хъуннеххайхсса ламу
5. Ваччату-Вихьливсса ххуллул 5 километра
6. Къянияту Вихьливсса ххуллул 3 километра
7. Мамраш-Ташкапур-Араканнал ламу тIисса ххуллул 3 км.
8. ШавкIрату Щаравсса ххуллул аьтарттуйхсса ламул проект дуван.
9.Хъурхъияту 2-мур ЦIувкI­равсса ххуллу бакьин бувансса проект дуван.
Вай давурттив дувансса арцу итадакьин ккаккан дурну дур, ЧIяйннал шяравусса спортзал ва Ваччавсса школа буванми кIанттул бюджетрава, вайми рес­публикалул бюджетрава. Ялагу вара программалийн бувну, шяраваллал цала бюджетрава бакьин буван ккаккан бувну бур шяраваллавусса кьуллардайн щин дурцусса бургъурду. Мукунсса давурттив дуван ккаккан бувсса шяраваллу дур: Ваччи, ЧIяйми, Хъюйми, СумбатIул, ЦIуйши, Ссухъиящи, Вихьул, Къян, Хъювхъи.
Цалийн бутан къавхьусса масъалану ливчIуна шяраваллавусса инсантурал цивппа заллусса къатраясса, (хъусну хIисаврайсса) налог ласун къабюхълахъаву. Налог ласуншиврул, уттисса законнайн бувну къатри щил дуссарив ккаккан буллалисса чагъар (зеленка) бикIан багьлай бусса бур. Му чагъар бувангу багьлай бур цала къатрал залуннал. КIилчингу, къатрал, уттисса зумуну учиннуча «рыночный» багьлуй багьа бищун багьлай бусса бур. Ва багьа бищавугу гьай-гьай ,багьлухсса дусса дур. Иш къуманивун багьавуну ци хъанай бур учирча, жула шяраваллавусса къатри чIяруми ччянира дурсса, кунницIун ку ларчIсса, чIяруми мурзусса кIанттай дурсса къатри дур. Цанналсса сагъну духьурча, гаманалсса заллухъру шяравату лагаврийн бувну лекьа-пIякьу хьусса дур. Инсантал бур: «Ттун къатри дуллалийни хIукуматрал кумаг къабувунахха, утти на къатрахсса налог циван дуллан тIиссара?»,- тIий. «На ттула къатрава налог къадулурча щил уккан увантIиссара?»,- тIий бур. Ялагу Ккуллал райондалий ба­къар цукунчIавсса идара къатрал багьа бищун бюхъайсса ихтияр дуллусса, учиннуча сертификат дусса. Мунийн бувну, ва масъала республикалул трибунардай гьаз буван багьлагьисса масъалану хъанай бур. Къатрахсса, аьрщарахсса (таксса инсаннацIун цIакь къадурну тIий) налогру къадатIин хъанай тIий, шяраваллал бюджетру ссуссукьуну личIлай, дуван аьркинсса давурттив къадурнува личIлай бушивуну чIалай бур.
ЧIиримур ишбажаранчишиву хъит учин дуваврил ишир­ттан хас дурсса программалуву гьаз буван бучIисса затну бия, райондалул циксса арцу харж дурну дурив ишбажаранчишиву хьхьичIуннай дуван, гай кIираксса республикалулгу итадакьин ккаккан бувну бушивриятусса зат бия.
Ккуллал райондалул муниципал сакиншиннарал уставраву ххисса статьярду ххи буван багьлагьисса ишну хъанай бусса бия, жула дянив терроризм чантIа тIий душиврийн бувну, ванийн къарши буккансса иширттан хас дурсса дахханашивуртту аьркинну дикIаврийн бувну.
Къуллугърай икIан бучIисса оьр­мулул шинну дузал хьушиврийн бувну, Райондалул Контрольно-счетный комиссиялул председатель Аллахвердиев ХIажи-Муси райондалул администрациялул, депутатътурал собраниялул чулухасса грамотагу дуллуну пенсиялийн тIайла увккуна. Ванан кIанай ивтуна МахIаммадаьлиев Ибрагьим. Ибрагьим ваниннин зий уссия Ккуллал райондалул администрациялул иширттай каялувшиву дуллай.
Сессиялул ахирданий Ккуллал шяравату бувчIусса шама депутат сессиялий гьуртту къавхьушиву бувсуна Гуйдалаев ХIамзатлул. Ми циван гьуртту къавхьуссаривгу кIулну бакъая, чагъарданий чирчусса бувчIин бавуртту дакъашиврийн бувну. Ванийну сессия къуртал хьуна.
Сессиялиясса репортаж хIадур дурссар ХIажимурад ХIусайновлул