Гьарцагу районнайн кунма, ЦIуссалакралмур райондалийнгу бучIай хIукуматрал вакилтал, агьалинал буруккинттах вичIидишин, цукунсса масъаларттах къулагъас дуван дурив ххал буван.
Мукунсса ирглийсса хьунабакьаву хьунни октябрьданул 1-нний Новостройрай. Республикалул культуралул министрнал хъиривчу Мурад ХIажиев цал хьунаавкьунни райондалул хъунама ХIажи Айдиевлущал. Министрнал хъиривчунал бувсунни Культуралул министерствалул региондалул ва федерал программардаву гьурттуну дуллалисса давурттая, бувсунни культуралул учреждениярттал хьхьичI бавцIусса агьамми масъаларттая. Мунал барчаллагь увкунни жагьилтал тарбия баврил даву райондалий ххуйсса даражалийн гьаз дуваврихлу ХIажи Шихамировичлухь.
Яла министрнал хъиривчунал кьамул бунни райондалул агьали. МуначIан увкIсса 10 инсаннава чIявуми бия райондалий ччя-ччяни ттукI лешлай бушиврия ва ФАП лакьаврия рязи бакъасса. Мурад ХIажиевлул махъ буллунни ми масъаларттал хъирив лаян, паччахIлугърал властьрал органнайн запрос гьан дуван. «Укунсса хьунабакьавурттал агьамшиву мури, ведомствалул вакилначIан МахIачкъалалив биян ччисса инсантураща шиккува хъанай бур цала масъалартту аьч буван. Жугу хIарачат буллалиссару агьалинал цуми масъалартту дузал буван багьлай буссарив хIисавравун лавсун, миннан жущава шайсса кумаг чIумуй буван», — тIий ур Мурад ХIабибович.
