Шушиннал школалий
[dropcap]М[/dropcap]арт зурул 22-сса кьини Шушиннал шяраву уттарашинна дия. Тяхъану бия хъунимигу, мюрщимигу. Шяраву кIицI лаглай бия Интнил хьхьунил байран – Навруз.
Шушиннал шяраваллил культуралул къатлул директор Давуд Кьурбановлул, ЦIуссалакрал райондалул культуралул, жагьилтурал политикалул, спортрал ва туризмалул управлениялул, Шушиннал школалул директор Шакират Абакаровал ххаллилсса байран дунни школалул хIаятраву шяраваллил жяматран ва дуклаки оьрчIан. Вайннал хIадур дурну дия «Барта мяш» тIисса концертрал программа. Балайрду, къавтIавуртту, цинявппагу хIала бувхсса дялахъру. Яла-яла хIазмур байрандалул лахIза – къавтIи бичаву. КъавтIи – марцI буккаврил ва цIу буккаврил лишан.
Чапаево шяраваллил оьрчIал багъраву
ЦIуминалийсса Чапаево шяравусса «Солнышко» детсадрай хьунни Интнил хьхьунин хас дурсса спортрал ва музыкалул шадлугъ. Детсадрал залдануву тIивтIуну бия лакку дукрардал гъагъавайсса, бартрал чIюлу бувсса ссупра. ОьрчIру, балайрду тIий, къавтIий, шадну бия.
Интнил байрандалул тарихрая ва аьдатирттая бувсунни оьрчIахь тарбиячитурал. Вайннал бувсунни 2010 шинал ООН-лул Генеральная аассамблеялул мартрал 21-сса кьини дунияллул халкьуннал дянивсса Навруз-байранну баян бувшиву ва оьвчаву дуршиву цинявппа билаятирттайн мунил сий гьаз дуллан.
Интнил хьхьунил байран дур жула халкьуннан ца яла ххирамур ва лахъа-хъунну кIицI даймур. ОьрчIру ссавур дакъа ялугьлан бикIай ва кьини ниттихъал дурсса бартри мяш учин.
Укунсса, буттал буттахъая шихуннай нанисса байраннал тарбия оьрчIаву дайссар буттал улклухсса ччаву. Миннуйнугу яшайссар жула аьдат-эбадатру.
ХIадур бувссар
А. Аьбдуллаевал
