КIюрх. Му кIюрх инттусса духьурча, хъиннура дакIнил макьугу даркьуну, чIявусса буруккинттугу махъ ливчIсса чIунну шай. Гьарца затра чантIа тIисса чIун. Интнил кьинирдай кIюрххил зунттавусса ххуллийх наниний вин баллантIиссар личIи-личIийсса макьанну рурцусса лелуххантрал макьаннугу. Гай макьаннах вичIи дирхьуний вил дакIнил мутта лахъи хъанай, улу чурххавусса цIуцIавурттугума гьаваллавун лер­ххун ларгун, чурх таза бувккун, ашкара хъанантIиссар.
ДуркIунни Лакку билаятрал дарардавун интнилхьхьунил кьинигу. Интнищал лачIун дуклакисса кIинтнил ва кьини цила марххалттанил пиягьру лухччинийн бичларчагу, дакъая дяркъусса кьини.

ХIажимурад ХIусайнов
Гьашину баян бувсса Маданиятрал шин тIитIлатIисса, Интнилхьхьунил кьини хьунадакьлакьисса уттарашинна дия райондалул Досуговый центрданул вивгу, хIаятравугу. Центрданул фойераву райондалийсса 14-рагу шяраваллил «къатта-къушру» тIивтIуну бия. Хаварду бикIай ваца къатта-къушливу ишла дайсса чIярусса затру жучIанна чарив дуркIссар тIисса. На къавихра миннуйн. Вай жулла шяраваллал къатта-къушаву, гана га яла хьхьичIунмур инсаниятрал дикIайсса, оьрму бигьану бутан ишла дувайсса тIахIни-кIичIугу, манкьулатругу дия шикку. Ялунссаннун, дукьрахIан, хьхьахьхьари, дурцIу дикIущалсса гьавккури, дагъ дурсса дикI, нувщи, ххункIру, личIи-личIийсса лагрурдайсса бартри, ххишалдаран, барчаман, ккаший бацIайсса ини. Вай «къатта-къушал» заллухърунугу бия шяраваллал маданиятрал идарарттал зузалт бакъагу, маданиятрал давурттавух гьуртту шайсса шяраваллил душ-оьрчIру. Циняв шиккусса душру, арамтал цала-цала шяраваллан хасъсса яннардаву бия. Буслан ттун бигьар, амма вай гьарца зат ккаклакиний жула миллатрал авадансса багьу-бизу бушивугу тасттикь хъанай, вай затру цачIун дурну, шиккун ккаккан дуван ларсун бувкIсса инсантал буниялагу «ххуйшиву» ссаву дуссарив кIулсса шеъриятирттал чIимучIалтту дакIний щябивкIсса зузалт бушиву аьлтта чIалай бия. Ванийн учин бучIия къатта-къушлил кьай-кьуйрал (оьрус мазрай учиннача) «поэзия» куну.
Ккуллал райондалул жямат Интнилхьхьунищал ва Маданият­рал шин тIитIлатIаврищал барча буван МахIачкъалалия бувкIун бия ДР-лул Культуралул министерствалул пишакартал Абакарова ПатIимат ва Оьмаров Супьян. Яла дайдирхьуна цурда байран. Шин тIитIлатIишиврия баян бувуна Ккуллал райондалул бакIчинал хъиривмур Сабрина Илиясовал. Ххуйсса мукъурттийсса ихтилат бувуна хъамалудуш ПатIимат Абакаровал.
— Маданият цирив кIулсса, мунил хIурмат буван бюхълахъисса миллат, му уттавасса миллатри. ХIакьину ттунна шивун, ва залданувун, бухханнин фойераву ккарксса тIахIни-кIичIулул, дуки-хIачIиялул, шиккун гьуртту хьун бувкIсса маданиятрал зузалтрал чIюлусса яннардал на хIайран бувунна. Ттун къакIулссия укун авадансса лаххия дусса инсантал архсса зунттаву яхьуну бушиву. ЦIуллу буваннав зу. Маданиятрал бюхъу дакIниву бусса инсанналли ядувантIисса ватангу, ганил ялун бучIантIимургу. Уттисса, гьарца кIанттайва инсаннал баччибакъулшиву, мин-тин бакъашиву чIяру хъанай дур тIисса чIумал, укун авадансса маданиятрал ттиркьюкьив ядурсса инсантурал мукун тIиминнайх лах бишин буллалиссар. Уттигу цал барча Маданиятрал шин ва ядувара лакрал миллатрал аьжаившиву никирая никирайн нани дуллай, — увкунни ванил.
Оьмаров Супьяннул дуруна конферансьешиву. СахIналий ккаккан буллалисса номердал лях-карах ванал бувсуна: «На 15 шинал хьхьичIва Ккуллал райондалия лавгун ухьурчагу, га чIумалва бивкIсса маданият­рал зузалтрал 90% шиккува бур. Ванийну тасттикь хъанахъиссар вай цалла даву хъинну кIулсса пишакартал бушиву», — куна. Буниялагу, сахIналийн бувккун ккаккан буллалисса номердурив цинявгу эбрат­рансса бия. Байран дайдирхьуна инструментирттай макьанну руцай ансамбльданул макьанная. Муданмагу маданиятрал давурттал сий дувайсса, Дагъусттаннал маданиятрал пишалул хIурмат лавайсса цIанин лайкь хьусса РайхIанат ХIажиевал балай увкуна. Ванил хъирив Ккуллал райондалул арамтурал хорданул, ххаллилсса чIунил заллусса ЦIуйшиял АхIмад АхIмадовлул солистшиву дурну балай учайхту, Супьян Оьмаровлул тасттикь бувуна хьушиву Ккуллал райондалийгу уттинин къабивкIсса арамтурал хор. Хъирив сахIналийн бувккуна, ца Дагъусттаннай бакъагу, щалагу СССР-данийгу Москавуллал съездру дувай залдануву къавтIун бивзсса, Вихьуллал шяраваллил къавтIалтрал ансамбль. Супьян Оьма­ровлул кIицI бувуна ва ансамбльданул дайдихьу дуршиву Вихьуллал школалул учительница, Дагъусттаннал хIурматрал цIанин лайкь хьусса Сиянат Аьлихановал. ХIакьинусса кьини ва ансамбльданий каялувшиву дуллай бушиву кIицI бувуна Дагъусттаннал маданиятрал пишалул хIурмат лавайсса цIанин лайкь хьусса Рукьижат ХIасанхIусайнова. Супьян Оьмаровлул вайннахь барчаллагь увкуна шяраваллил маданиятрал ттиркьюкьив ядуллай бушаврихлу. СахIналийн балай учин бувккуна МахIад Гудов, Саманият Аьлиева, Шагьун СалихIова (Ккулату), Гриша Ванатиев (Хъусращату), Муслим Суллуев (Ваччату), ХIабибуллагь Кьурбанов (Ссу­хъиящату), ПатIимат Каптарова (СумбатIлия), Асият МахIаммадова, Гулжагьра Рамазанова (ва Центрданул пишакартал). АхIмад АхIмадовлул цалалу балай учаву дакъагу, ЦIуйшиял «ГъартIу» тIисса мукьва душнищалсса къавтIавугу ккаккан дуруна. Байран хъунна дуван бувкIсса Лаващиял райондалиясса Оьмаров Сайгидлул, Роза Сулаймановал мукун гур дагьан дурунахха, тамашачитал щябивкIсса кIанттал дянив бувккун къавтIий бия. Сайгидлул яру мазрай, Розал даргири мазрай балайрду увкуна. Лакрал райондалия байрандалийн бувкIсса Шамсият Какваевал, Мариян Жамалуттиновалгу хъинну ххуйсса балайрду увкуна. Хъинну хIазсса пьесалувасса парча ккаккан бувуна Хъусращиял шяраваллил халкьуннал театрданул. Ванил режиссерну усса ия ХIусайнаев АхIмад. Тяхъашивурттал ахирданий ялагу махъру лавхъуна Абакарова ПатIиматлул ва Супьян Оьмаровлул. Вайннал гьашину Ккуллал райондалул маданиятрал управлениялул хъунмурну цIуну бивтсса Марина Ибрагьимовахь хъунмасса барчаллагь увкуна, укун захIматсса даву бакIрайн ларсун хъинну ххуйну хIадур дуваврийн бувну, чIа увкуна мукьахунмайгу маданиятрал давурттаву хьхьичIунмайсса шаттирду.
Яла циняв кьатIув бувккун, хIаятраву бивчуна къавтIи. Мунил лагма къавтIий, «ЦIуцIавуртту цIаравун, цIуллушиву чурххавун», — тIий бала-гьалайрдай, къавтIилул лагма тяхъашиву дуруна.