[dropcap]И[/dropcap]юнь зурул 29-нния байбивхьуну июль зурул 5-ннийн бияннин Дагъусттаннай хьунни «Зунттал халкь» тIисса цIа­нилусса дунияллул халкьуннал дянивсса фольклорданул ва аслийсса культуралул IX-мур фестиваль. Ва фестиваль дуллалиссар 2012 шиная шихуннай ЮНЕСКО-лул хъаттиралу.

[dropcap]Ф[/dropcap]естивальданул агьанмур мурад бур Дагъусттаннал, Аьра­сатнал ва щалагу дунияллул халкьуннал аслийсса культура ядаву ва машгьур даву. Фестивальданул сий ялу-ялун гьаз хъанай дур, шиная шинайн гьарза хъанай бур гьурттучитал.
Гьашинумур фестивальданий гьуртту хьунни Аьрасатнал кьура региондалиясса ва мяйва чил билаятирттаясса творчествалул коллективрду. Мукунна шикку гьурттушинна дунни 30-ннийн бивсса Да­гъусттаннаясса художествалул ва творчествалул коллективирттал. Дагъусттаннал агьалинан ххаллилсса бахшишну хьунни нюжмардул дянив Чехнал, Словакиянал, Сербиянал, Ираннал, Азирбижаннал, Къазахсттаннал, ОьзбакIнал, Турк­маннал билаятирттал, Къалмукьнал, Къарачай-Чаргаснал, Ккабардин-Балкьарнал, Ингушнал, Ухссавнил АьсатIиннал, Чачаннал республикарттал, Ставрополлал ва Пермрал крайраясса, Белгородрал, Роставуллал, Пензаллал, Аьш­ттарханнал, Ярославуллал, СаратIовуллал областирдал ккаккан дур­сса цала-цала культурарду майшан тIисса авадан­сса программартту.

Фестивальданул лагрулий Индиянавасса делегация бувкIунни ЦIуссалакрал райондалийн.
Хъамал чан къашайсса ва мудангу хъамаличунал хIурмат бусса ЦIуссалакрал райондалий бюхттулсса даражалий хьунабавкьунни «Гьиндусттаннал макьанну» тIисса фольклорданул ансамбльданул коллектив.
ЦIуссалакрал шяравун бухха­н­нинсса ххуллурдай тIу­тIащал, дукрардащал, зю­ннав-дачIулущал хъамал хьунабакьин бувккун бия райондалул хъунама ХIажи Айдиев бакIчисса администрациялул вакилтал, ЦIуссаккуллал шяраваллил жямат, райондалул идарарттал коллективрду ва дуклаки оьрчIру.
ЦIуссалакрал шяраваллил майданнив хьунни кIивагу миллат хIала бувхсса гур­сса къавтIавуртту, рирщунни дакI­ний личIансса суратру.
Дирхьунни тIутIив 1999 шиналсса дяъвилул иширттаву жанну дуллуминнал гьайкалдануцI. Муния махъ хъамал лахъа-хъунну хьунабавкьунни Культуралул управлениялул къатраву.
Барча буллалисса ихтилатгу бувну, цIанихсса УнцIукIуллал усттартурал ваза бахшиш дунни хъамаллуран.

Хъирив хъамаллуралгу, райондалул культуралул управлениялулгу ккаккан дунни цала-цала хIадур дурсса программартту.
Муданнагу индиянал культура, кинорду ххирасса райондалул жяматрал, гужну хъатру ришлай, кьамул дунни тайннал къавтIавуртту ва балайрду.
МухIуттин Чариновлул цIа­нийсса ЦIуссалакрал театрданул артистътуралгу цала зумуну усттарну ккаккан дунни хъарас щаврил аьдат.
Концертрал программа къуртал хьуну махъ сахI­налийн лавхъунни индиянал делегациялул бакIчи. Райондалул агьалинахь барчаллагьгу увкуну, дуллунни Индиянава ларсун бувкIсса бахшишру. Бувсунни гьашину цивппа 17-чин бувкIшиву Аьрасатнал билаятрайн ва укун дакI тIиртIуну, хIурмат-кьиматрай чувчIав кьамул къабувшиву.
— Дагъусттаннал халкьуннан хъинну ххирассар индиянал кинорду, индиянал артистътал. Мунияту, жучIанма Индиянавасса делегация бучIантIишиву бувсукун, жул жямат хъинну ххари хьунни. ЦIуссалакрал райондалул чIявусса шагьрурдащал ду­ссар уссурвалшиврий­сса хIала-гьурттушиву, дусшиву. Амма чил билаятращал да­къассия царагу мукунсса дахIаву. Утти жучIа архсса Индиянал билаятраяссагу дус­тал хьуссар, — увкунни райондалул бакIчи ХIажи Айдиевлул. Ванал махъгу буллунни сентябрь зуруй райондалул делегациялущал Индиянавун хъамалу учIансса.
Ахирданий, авадансса ссуп­рагу тIивтIуну, индиянал коллективравасса душваран райондалул бакIчинал бахшиш дунни арцул канишру. МахIаттал-хIайран хьуну бия индиянал душ­ру оьргърал усттартурал каруннал магьиршиврий.
Андриана Аьбдуллаева
Имара Саидова