— Год назад ушел из жизни неожиданно быстро, оставив много неосуществленных задумок и свои великолепные роли великих людей исторического прошлого, Заслуженный артист РД, замечательный человек Магомедов Магомед Мусаланович. Уроженец селения Кума Лакского района Магомед Магомедов пришел в Лакский театр в 1973 году, после окончания актерской студии Ереванского театрального института. На днях в Махачкале в Фонде культуры прошел Вечер памяти Магомеда Мусалановича. В нем приняли участие коллеги, родственники, друзья, поклонники артиста. Магомед Мусаланович Магомедов останется в памяти всех, кто его знал, как замечательный артист, добрый человек, добропорядочный семьянин и член коллектива.

Шаэр дунияллия лавгукун, аьпалун личIай мунал чивчусса луттирду, произведенияртту, балайчиная аьпалун – мунал чIу, балайрду, артистная – мунал дургьуну ивкIсса роллу, му гьурттуну ивкIсса пьесарду. Инсан ци пишалул усттар унугурив муная, хьхьичIра-хьхьичI, аьпалун личIай хъин-хъинсса давурттив, аьрщарайва ливчIминнал ххуйсса, хъинсса мукъуйну дакIнийн утлай, дакIнийхтуну «аьпа баннав» куну учинсса.
Апанни Къапиевлул цIанийсса Лакрал музыкалул ва драмалул театрданул артист, аьпа биву, МахIаммадов МахIаммад Мусалановичлуягу аьпалун лирчIунни мунал дургьуну ивкIсса ххалли-ххаллилсса роллу, мунал чаннасса, пиш-пиш тIийнмасса яру, хъиншиву, инсантуращалсса хIала-гьурттушиву. Ванияр шинал хьхьичI щилчIав бакIравунмагу къабухханссия МахIаммад ваксса ччяни сахIналиягу, оьрмулувагу гьанссар тIисса. Ххаллилсса артист, хIакьсса зунтталчу МахIаммад МахIаммадов дакIнийн утлатисса аьпалул вечер хьунни МахIачкъалалив январьданул 11-нний.

Бадрижамал Аьлиева
ДР-лул Лайкь хьусса артист, ДГУ-рал культуралул факультетрай «актерское мастерство» дарсру дихьлай, махъа нанисса никиращалгу актершиврул усттаршиву кIидачIлай, жагьилтал тарбия буллай ивкIсса МахIаммад Мусаланович оьрмулува лавгунни дан дакIнийсса цикссагу давурттив, дугьан тIий ивкIсса цIу-цIусса роллугу кьадиртун.
ЦIанихсса артист дакIнийн утан ва кьини Культуралул фондрал къатравун бавтIун бия ванащал архIал дуклайгу, зийгу бивкIми, мунал аьпа абадми, мунал гъан-маччами, дустал, ца лакрал миллатрая бакъассагу, ца Лакрал театрданувасса бакъассагу, цайми миллатирттал вакилталгу. Ва батIаву дайдирхьунни Лакрал театрданул директор ХIусайнов МахIаммад

 

ХIусайновичлул. Му усттарну дачин дурну, лях-карах МахIаммад Мусалановичлул оьрмулия, мунацIун бавхIусса хъин-хъинсса дакIнийн бичавуртту буслай ия театрданувува хъуна хьусса, щиннияргу ххуйну артисталгу, миннацIун бавхIумургу кIулсса, Лакрал театрданул хъунама режиссер МахIаммадов Аслан Садикьович. Хъирив АьФ-лул Лайкь хьусса артист Алексей Тимохиннул дурккунни артистуран хас дурсса назму.
АьФ-лул искусствалул лайкь хьусса зузала Гулизар Султановал МахIаммад Мусалановичлул оьрмулия ва творчествалия бунни гьарта-гьарзасса ихтилат:
— МахIаммад Мусалановичлуя гъалгъа тIун захIматну бур, гъалгъа къатIунгу бюхълай бакъар. МахIаммад ттун анжагъ нава чичлачисса артист акъар, ва ттул шяравучугуя, чIира лях бакъасса чIаххучугуя. Ттун МахIаммад кIулссия чIивиниява, дакIний ур оьрчIний цала буттал шяраву Кумав кIичIирттавух лечлай. Мунал нитти-буттачIансса – фронтовик МусаланнучIансса ва зунттал хъамитайпа АймисайчIансса – хIурмат ттучIа хъунмассмя.
МахIаммад увссар 1947 шинал мартрал 26-нний МахIачкъалалив
4-мур школагу къуртал бувну, цаппарасса шинну хьуну дур гихунай цанма ссаха зун ччиссарив бувчIиннин. Амма чIун оьнна гьан дуллай ивкIун акъар. Зий ивкIун ур электрикну, слесарьну, Химзаводрай, Радиозаводрай, Сепаратордал, М. ХIажиевлул цIанийсса заводрай. Дустал дуклан Арманинавун най, миннал цащала ачу тIий, лавгун ур МахIаммадгу. Мукун, МахIаммад увххун ур Ереваннал Театральный институтравун. Му къуртал бувну бур 1974 шинал. Цалва захIматрайну, хIарачатрайну МахIаммадлуща бювхъунни хьхьичIунсса ккаккиярттайн лахъан, мугу цала буллалисса ихтилатрал жагъалашивугу дунура. ЗахIмат ххирашиву дакъахьурча, инсаннаву бусса гьунардания цичIав мюнпат бакъассар учай. МахIаммад уххаву дакъа буллалисса захIматрайну най унува цукссагу лавай хьуна. Ванащал архIал зий бивкIминнан кIулссар, цалва ихтилатравусса диялдакъашивуртту духлаган дуллай, цуксса захIмат бувссарив, цала ялув цуксса авцIуну ивкIссарив цалла дугьлагьисса роль щаллу хьуннин. Мунал най дунара усттарну дургьуна агьамми роллу. Лакрал театрданул репертуарданувун увххун, цаннил хъирив ца ялун личлай дарчуна МахIаммадлул дургьусса цаннияр ца яргсса роллу: Р. ХIамзатовлул «Горянкалувусса», Мазяйхъал Казбеклул «Казикумухская серенадалуву», «ПартIу-ПатIима», «Ккурккуллал Щаза», «АхIмадхан-Султан», «Удрида бава», ва чIявусса цаймигу пьесардаву. МахIаммадлул цара-цану магьирну, усттарну комедиярдавусса роллугу дугьайва, цала тIимуний, дуллалимуний цува хъяй акъача, пишвагу къаувкуну, хъинну усттарну, бурувгми хъянсса куццуй, мукунна трагедиярдавуми роллугу. МахIаммадлуща бювхъуна цанниха-ца къалархьхьусса роллал щаллусса галерея сакин буван. МахIаммад сайки циняв спектакльлавух гьурттуну икIайссия: классикалул, уттизаманнул драматургиялуву дургьуну икIайва кунниха кув къалархьхьусса роллу. Яла-яларив мунацIун дакьайва тарихравасса личностирдал, вирттаврал, аьрали начальниктурал роллу. Жямат цачIун буллалисса, тарихраву хъунмасса агьамсса кIанттурду бувгьусса личностирдал, вирттаврал роллу хьхьичIра дугьайссия МахIаммад Мусалаевлул. Муная махъ ми усттарну дугьлан ивкIунни МахIаммад Мусалановичлул. «Хан-Муртазяли» пьесалуву, най дунара, дуллуна МахIаммадлухьхьун Сурхай-ханнал роль. Му ххаллилсса куццуй дугу дургьуна мунал, цала виричунал щала биографиялувух увккун, литературалул цимирагу чIапIи ххилтIу дурну, цалва даврил уртакьтуращал маслихIат ккаклай, хъунмасса захIмат бивхьуну, жува вих хьун бунну хьхьичI авцIуну мяйжаннугу Сурхай-хан ушиврийн. Мукунсса спектакльлугу хъинну чIявуссар. Дурмуний гьашиву къадайва МахIаммадлул. Москавлив язими режиссертурачIан цалва сипталийну занай, стажировкардай, лабораториярттавун тIий, занай, мудан цала ялув авцIуну, цалла даврил усттаршиву хъиннура ларай дуллай, магьир дуллай икIайва. Мукун МахIаммадлул Москавлив бувккуссар ГИТИС-рачIасса Лавайми режиссерский курсру. Цаппарасса хIаллай режиссернугу ия, амма артистналмур даврихсса ччаву ялтту дурккуна. Махъсса шиннардий МахIаммад зий уссия «Ромео и Джульетта» пьесалуву Капулеттил рольдануха. Цуксса хIайпнугу, МахIаммадлуща, къашавай хьуну, му пьесалущал сахIналийн уккан къавхьуна. Му дия мунал махъра-махъмур роль. МахIаммадлун хъинну ххирая цалла даву, байрандалийн куна мунийн агу ачайва. МахIаммад ия ххишала акъа хъинсса, аьркинний кумаг буван учIан хIадурсса, цинявннащал цасса маз лякъайсса, му ия чIаравминнан дусгу, уссугу. МахIаммадлул хьхьичIунсса гьурттушинна дувайва театрданул жяматийсса оьрмулувух, Лакрал художествалул советрал членнугу ия. ДГУ-рал культуралул факультетрай дарсру дихьлай ия.
Оьрусрай учай «Незаменимых людей нет» куну. Амма бикIай мукунсса инсантал. Лакрал театрдануву МахIаммадлул дугьлай ивкIсса роллу дугьанма цIанакул акъар. МахIаммад аьпалул шаврийну хъунмасса хъатI багьунни ца Лакрал театрданий бакъассагу, ванал кулпатрайгу. Ванияр шиннардил хьхьичI, эшкьи хьуну, Ереванная бувцуну увкIсса душнищал оьрмулул цимирагу шинну дирчунни. МахIаммадлул ва Татьянал дянив хьунни 2 ххаллилсса душ. МахIаммад мудангу дакIний икIантIиссар кулпатравуминнан, мунащал зий бивкIминнан, му кIулну бивкIминнан…, — увкунни Гулизар АхIмадовнал.
Гихунмай махъру лавхъунни АьФ-лул искусствалул лайкь хьусса ишккакку, Къумукьнал театрданул хъунама режиссер Ислам Казиевлул, ДР-лул лайкь хьусса артист Владимир Мещериннул, Оьруснал театрданул художествалул каялувчи, АьФ-лул искусствалул лайкь хьусса ишккакку Мавлет (Скандарбек) Тулпаровлул, Лакрал театрданул художествалул каялувчи Бадрижат МахIаммадхIажиевал, ДР-лул лайкь хьусса артистка Уди Аьлиевал ва ДР-лул халкьуннал артистка Жинасат ДинмахIаммадовал, киноактер, МахIаммад Мусалановичлул дус МахIаммад Сурхатиловлул, мукунма мунал дустал Маммаев АбутIалиблул ва МахIачкъалаллал 18-мур школалул директор Салим Аьбдулкьадировлул, ДР-лул лайкь хьусса артист Гамлет Макьсудовлул, режиссер Марина Карпачевал, «Дагъусттан» РГВК-лул арт-директор Ариза Батыровал, ДР-лул Халкьуннал артист, Яруссаннал театрданул режиссер Хайбулла Аьбдулгъапуровлул, Аьрасатнал лайкь хьусса артист ХIусайн Казиевлул, ДР-лул искусствалул лайкь хьусса ишккакку, доцент, ДГУ-рал культуралул факультетрал преподаватель Изумруд Аьлиевал ва цайминнал. Ми цинявнналгу МахIаммад Мусалановичлуя бусанмур, учинмур чIявуя. Ва кьини лавхъунни хъин-хъинсса махъру, бувсунни МахIаммад МусалановичлуцIун бавхIусса хIазсса, оьрмулухун дакIний ливчIсса ишру. Ца зумату кунма, циняв буслай бия мунал дакI хъиншиврия, захIмат ххирашиврия, дакI тIиртIушиврия, театрданийн оьрмулухун хаин къашаврия. Ци банссар, инсан лагай, махърив личIай мунаясса дакIнийн бичавуртту.
Ахирданий ва батIаву дурминнахь барчаллагь увкунни МахIаммад Мусалановичлул уссу Аьлил МахIаммадовлул. «Укунсса аьпалул вечерду шайссаксса чан хьуннав, оьрмулуву ххаришивуртту, хъиншивуртту чIяру даннав, культуралул зузалтрахсса хIукуматрал чулухасса къулагъас лахъ хьуннав», — увкунни мунал.
Лакрал театрдануву МахIаммад Мусалановичлущал цикссагу шиннардий зий бивкIминнал, мунал кулпатрал, душварал, дустурал дакIурдиву мунаясса аьпа личIантIиссар оьрмул оьрмулухун.