Ххирасса Качар, вил ккуран! Ттул хъунмасса хIалли зучIан чичинна тIий, амма цIуллу-сагъшиврул хIал ялтту буклай, хъунмав шаву дахчилай, уттинин чичин къабювхъунни. Бухьунссар цаймигу инсантал, на кунма жулва маз ххирасса, «Илчилуха» чIалачIин дакъасса, амма зучIан чичин ка хъирив къалаллалисса.

«Илчи» ттул рухIгур, жангур. Ва кказит буклан бивкIун махъ цурда ца шин къаритав къачивчусса, ссавур дакъа ялугьлай бикIара гьарца цIусса номерданух. На оьрус мазрал муаьл­лимъяв, амма ттула дакIнивусса щугълурдугу, пикрирдугу мудангу бикIайва лакку мазрайсса. Ттухьва нава бикIайссияв хьурдай лакку мазрал дарс дихьлан тIий. Ца чIумал учительтурал августовский совещаниялий тту­хьхьун махъ буллуна, жулва мазрая буси куну. КутIану бусан, на учав: «Оьрус мазгу жулвар, амма къюкIливусса, дакIнивусса щугълурду ттул бикIай ниттил мазрайсса. Ниттил мазраймур ихтилат бикIай ляличIиссава, дакIнин малхIансса, къюкIлин дарувсса, нацIусса. «Персик» увкукун, ттун му букан, къабукан личIишиву дакъар, му букансса зувугу къадагьай, амма лакку мазрай «цIулит» увкукун, ляличIисса ишттахI багьай, му букъавкуну бацIан къахьунсса. Мукунма «виног­рад», булурча буканна, къабукарчагу, дард дакъар. Ла­кку мазрай «лухIитIутIи» ягу «къюмайтIутIи» увкукуннив, личIиссава асарду хIасул шай.
Аьпа биву, Надир Хачилаев уссия жула лакку маз ябаврил ххуллий зий, му куртI буллай, хъуннасса даву дачин дурну. Мунал хияллу душманнал аскисса ккуллалул кьатI бувна.
Качар, ххирамур, инагу, вил ккурангу ххаллилну зий, хъуннасса аякьа дуллай буру жулва лакку мазраха. Му хъинну хъуннасса, чара бакъа аьркин­сса давур. Маз бакъахьурча, жувагу бакъассару. Вания тиннайгу зухьхьун Аллагьнал каши дулуннав мукунма зунсса, миллат­рал ттугъ кунма, лахъну кказит бачин бансса.
Муданмагу ттун кьутIлай бикIай, жулва ххаллилсса ла­кку мазгу тинмай бувну, жула лакрал инсантал чIявуми цаннащал ца, цалва оьрчIащал, оьрчIал оьрчIащал оьрус мазрай гъалгъа тIий бикIайшиву. Махъсса шиннардий на зий ба­къара. Школалий зузисса шиннардийрив ттучIан дарсирдайн бучIайва чIявуми оьрчIру ла­кку маз къакIулну. Вайми миллатиртталми оьрчIру тIурча, цалва мазрай гъалгъа тIий бикIайва. Ххаллилсса даву дунни хIукуматрал миллатрал мазурдийсса дарсру дихьлахьи баву. Амма шикку муаьллимнан аьркинну бур лакку мазурдил дарсру, цукун-дунугу къадихьлай, куртIну дихьлан, цивппагу оьрчIащал марцIну лакку мазрай гъалгъа тIий. Ниттил мазгу, оьрчIругу дакIнийхтуну ххирану. Ца чIумал Анжилив Лакрал театрдануву хьусса шадлугъир­ттай Каспийскалиясса ттул дуклаки оьрчIругу гьуртту хьуссия. Жула Руслан Башаевлул ттухь цIувххуна: «ПатIимат Будаевнай, ми оьрчIру мукун бювхъуну хIадур буван цукун шай вища?» — куну. На, гьанавиххулгу хьуну, учав: «Ци чиви, ттун оьрчIру ххирар, гайннангу – на». Цавай учительтурал хIарачатрайнугу оьрчIан маз лахьхьин буван къашайссар, агарда шаппа нину-ппу лакку мазрай гъалгъа тIий, му буруччин аьркиншиврия ихтилатру буллай бакъахьурча. Учин ччимургу мура, ниттил маз лахьхьавриву, лакку мазрал учительтурал давриву хъунма­сса кIану бугьлай буру зу, циняв­ппагу лагма лавгун, итабакьлакьисса кказитрал. Амма гьашину кказитрал лагру чансса чIири шаву щала тIааьн бакъасса ишну хьунни.
Ва ялагу. Ттун ххишала бакъа хъунмасса барчаллагь учин ччай бур «Илчи» кказитрал зузала Бадрижамал Аьлиевахь. Цалчинма цалчин ва ттул мероприятиялийн школалийн бувкIссия ванияр 9-10 шинал хьхьичI. На махIаттал бувнав ва жагьилсса душнил дакIнивусса цилва миллатрахсса ччаврил. Муния тинмай гьарца на дуллалисса мероприятиялийн бучIайва Бадрижамал, ттун ва ттулва душ кунма ххирагу хьунни. Жагьилсса бунугу, цилла даву исвагьину, куклуну, цила кIанттайн дуртун дай­сса душ бур. На гъирарай дуккара мунил чичлачисса гьарцагу макьала. Бадрижамал, ттул душ, вин хъунмасса барчаллагь.
Ххирасса «Илчи» кказит­рал коллектив! Барча зул юбилей. Зун тIайлабацIу вания тихунмайгу ласласисса гьарцагу шаттираву, дуллалисса гьарцагу давриву. Зул кулпатирттаву ххарисса, хъинсса ишру чIяву баннав.
Ахирданийгу, хIалу дирирну дунура, хъунмасса миннат­ри муаьллимтурахь, нитти-буттахъахь, лахьхьин буллалияра зулва оьрчIан лакку маз. Жува бакъассару, маз бакъахьурча. ЧIарав бацIияра жулва миллат­рал ца агьаммур бутIану хъанахъисса «Илчи» кказитрал.

Ина ттулла, ниттил маз,
Ттул кашира, ттул гужра,
Шадний чайсса балайра,
Къуманий чайсса угьра.

ПатIимат
Будаевна МахIаммадова,
РСФСР-данул просвещениялул отличник, ДР-лул лайкь хьусса учитель, лавайсса категориялул учитель
ш. Каспийск