Ххирасса редакцияй!
На, чунчIавгу буккан къа­хъанай, ялугьлан бикIара жулва миллатрал кказит бучIа­ннин. Жулмур почтальонгу ххуйсса бур, на Финансовый техникумрал райондалий ялапар хъанай бура. Кказит чIумуй биян бувай.

Ттун кказитрайхчIин кIул шай лакрал оьрмулуву хъанахъисса иширттая, дунияллий хъанахъимуния. Яла-яларив ттун дакI дакьай инсантуран мяърипат лахьхьин дуллали­сса, ххуймур гьаз буван ла­хьхьин буллалисса макьаларттай. ДукIура «Илчилий» чирчусса СутIаев СултIил ва ХIусайнаева ПатIиматлул макьалартту кIил-кIийлла дуккав. Ми макьалартту цал уттигу рищун бучIия, аьркин дакъасса тIуллу дуллалисса жагьилтуравунгу яхI багьайрив ккаккан. ЦIанакул инсантуран инсаншивунияр цайми затру хьхьичIунну дур, ялун нанисса никирал тIуллал ва багьу-бизулул жувунна нигь рутлай дур. Мунияту ххуйсса инсантураясса, миннал уздансса тIуллаясса макьалартту жагьилтуран дарсну хьун аьркинни. Мукун ххаллилсса инсанная бусан ччай бура нагу хIакьину.
Дуккаву къуртал хьуну махъ жу зун Гъумукун лавгссияв. Кьукниятусса Нават тIисса хъамитайпалучIа къатта бувгьу­ссия. Нават дакI-аьмал хъинсса хъамитайпа бия, мунил, жух бурувгун, гьар аьркинмунил кумаг байва, цIуххайва ци аьркинни, ссал кумаг бави куну. Мудан укун дувара куну маслихIат байва. Наватлул янна дуруххайва. Ттухьгу увкуна: «Бургу, ттул душ, хъамитайпалун так ца дукра къагьассар, ххалаххи бучIан, янна дуруххай машина зузи буван кIулну хъинссар. Ххал-ххалаххул даву мудангу ичIура аьркинсса давур, дарзишиву къадулларчагу, хъинну дучIи лякъинтIиссар оьрмулуву». Наватлул учайва: «На шану лахъаннин, ва машина зузи буван лахьхьи», — куну. Мунил шану лахъансса мажалвагу къабикIайва. Ттун янна дуру­ххангу лахьхьин бувна. Аьпа биву, ххаллилсса хъамитайпа бия. Гания ттун чIявусса затру лавхьхьуна, чIявуну аьпа­гу учара. ЗахIмат бангу гания лавхьхьуна. Нават хьхьувайвагу шану лахъан утту къабишайва, дахьва цахъис хIаллайсса чул бувайва ца тахлий. На ганихь бикIайссияв утту циван къабишара тIий. Наватлул учайва мудан: «Гьун­ттийнин янна дуруххан аьркинни, уттубиширча, ттул даву щил дувайссар!» Мудан му ца жаваб дикIайва. Мяйжаннугу, чIявусса инсантал бучIайва муничIан янна дуру­ххан, кIюрххилнин ми янналулсса бан багьлай, Наватлул хьхьурду уттара дувайва. ЯхI бусса хъамитайпа бикIайва, цил бунагьирттал аьпа буваннав, уманахьхьун цIуллушиву дулуннав. Му бия аьлимчу ва чичу Сулайман Мусаевлул нину. Оьрмулухун жул дакIурдивун хъиншиврул гьанна бивчусса Нават.
СултIанат СантIуева,
захIматрал ветеран

Ттунгу дакI даркьунни «Илчилул» юбилейран хасъсса рубрика дачин дуваву. Кказит итабакьлай байбивхьусса шиная шинайсса буккура на. 2006 шинал дачIи шинайсса кказит къачивчуну ливчIун, пIякь чавай ливчIунав, гьарца номер ласун лагайссияв ттула ссурахъичIан. Цала буккайхту булайва мунал ттухьхьун. Нюжмар кьини кувний, ссавур диял къахъанай, на лагай­ссияв ссурахъичIан. Жу, кказит кIибачIлай, цаннаща-цагума зехлан бикIайссив, ссурахъил кулпат жуй хъян бикIайва, амма цуппагу жу буккиннин къабитлай, ХIасан КIурухов ци чичлай ур, Роза Эльдаровал ци тIар тIий, кказит зехлан бикIайва. На яхъанахъисса 1-мур МахIачкъалалив киоскирттайгу бахлай къабикIайва «Илчи» му шинал, циван къабивкIссаривгу къакIулли, ттулла щарссагу дяъван дикIайва, ссурахъичIан къа­ххяхлай, кказит машан ласайсса кIану лякъи тIий. Та шиная махъ подпискалул чIун дайдишайхтура лечайссара на кказит чичин. Миллатрал кказит къабуккара тIисса инсангу ттун къаувчIай. Циняв автортал генийтал къа­бикIайссар, я циняв лащинну чичлачисса къабикIайссар. Миллатрал маз ххираманал мудангу лякъинтIиссар му мазрай чивчусса буккинмур.
1991 шиная шинмай кказитрал хъинну агьамсса кIану бувгьу­ссар миллат чантI учин бавриву, ккуркки лаган бавриву. ХIакьину интернетравугу бур «Илчи». Амма ттун къаххирар кказит интернетраву ккалан. Совет заманнул лакъахIай аьскар ухьунссара. Типографиялул кьанкь дусса кказитгу каруннивун лавсун, щяикIантIиссара ккалан, авай, ца талихIрал лахIзар ттун му. Игьалагара!
На ттулва миллат кказит ба­къа къаличIаннав тIий ура. Жунма кIулли миллатрал маз ялун нанисса никирачIа бусравну ва санну бакъашиву. Му жуйва­ссагу тахсир бушиву. Му кIану хIисавравун лавсун, кказитрал цилва биялалиймур бунни, буллайгу бур. Кказитрал юбилей – му чара бакъа миллатрал байран хьунгу аьркинссар.
АьбдурахIман Кьурбанов,
пенсионер