Гьантлия гьантлийн шаттирду бизлай най, цила аргъиравун духлай дур инт. Мунил хъирив лаянмур буллай, дуван аьркинсса давуртту лях къаличIанмур буллай,щиривкIуну бур хъузалтгу. Миннал «ххуржинттаву» цанмасса кIану лякъинссар тIиссару вай маслихIатиртталгу.

---

Ххяххиярттан ца кIанайсса мина душманссар

ЧIярусса шиннардий ахънилсса цара-ца кIанай дугьларча, бакIлахъругу мискинсса хъанантIиссар, аьрщигу, чIукьа дурккун, зия хьунтIиссар. Ахънилсса дугьлагьисса кIану баххана буллалийнигу, кIулну бикIан аьркинссар ссал хъирив ци дугьан бучIиссарив, ци дургьуну диркIсса кIанай ци къабучIиссарив.

Нувщи

— Нувщи цава-ца кIанай 3 шинаяр ххишалану бугьлай къахъинссар. Нувщи бувгьуну хъинссар муниннин калан, къур, чIикIунтIа, кьая бувгьуну бивкIсса аьрщарай.
— Нувщи мабугьари муниннин помидор дугьлай бивкIсса аьрщарай.

Чимус

— Чимус бугьлагьисса кIану 3-4 шинавун баххана бувну хъинссар.
— Чимусун дакьайссар нисварти, къавахъ, калан, помидор, нувщи бувгьуну бивкIсса аьрщи.
— Чимусун ххирассар оьргъашивурттал дурччусса, мукунна куклу­сса, кIукIлусса аьрщи, яргсса чани.

Къур

— Къур дургьуну хъинссар нувщи, калан, щюлли уртту (салат­рал чIапIив личIаннин) дургьуну диркIсса аьрщарай.
— Мукунна бучIиссар помидор ва мюрш хъюрув ххяхлай диркIсса аьрщарай дугьан.

Лаччи

— Лаччи бугьлагьисса кIану 2 шинай цал баххана буван аьркинссар.
— Лаччи бувгьуну хъинссар нисварти, нувщи, калан бувгьуну бивкIсса кIанттай.

Калан

— Калан цава-ца кIанай бугьан бучIиссар 2-3 шин лях ларгун махъ. Калан бувгьуну хъинссар нувщи, помидор, нисварти, чимус бувгьуну бивкIсса аьрщарай.
— БучIиссар мюрш хъюрув, шагьнал хъюрув, къур, чIикIунтIа дургьуну диркIсса аьрщарай бугьангу.

Нисварти

— Нисварти бугьлагьисса кIану гьарца шинал баххана бувну хъин­ссар. Ми яла ххуйну шайссар калан бувгьуну бивкIсса кIанай.
— Мукунна нисвартилун дакьайссар помидордая, нувщуя, мюрш хъюруврая ва чIикIунтIалия махъсса аьрщигу.

Помидор

— Помидор дургьуну хъинссар калан, къавахъ, хъюрув дургьуну диркIсса аьрщарай, бучIиссар къуруя, чIикIунтIалия, чимусуя махъ дугьангу.
— Лавайгу увкусса куццуй, нувщун кунна, помидорданунгу къаххирассар нувщи бувгьуну диркIсса аьрщи.

ЧIикIунтIа

— ЧикIунтIа дугьлагьисса кIану 3-4 шинай цал баххана бувну хъинссар.
— ЧIикIунтIа ххуйну хьунтIиссар нисварти, калан, помидор, нувщи, хъюрув дургьуну диркIсса аьрщарай.
— ЧIикIунтIа шпинат дургьуну диркIсса аьрщарай дургьуну къахъинссар.

Кьюнукьи

— Кьюнукьи бувгьуну хъинссар кьая, салат, гъаран, ччимур журалул хъюрув, къур, чимус, ла­ччи, сельдерей дургьуну диркIсса кIанай.
— Нувщи, помидор, нисварти бувгьуну бивкIсса аьрщарай кьюнукьи бугьан бучIиссар так 3-4 шин ларгун махъ.

Бадуржан

— Бадуржан (баклажан) бувгьуну хъинссар нисварти, чимус, калан бивкIсса кIанай.
— КъабучIиссар бугьан ларгсса шинал нувщи, помидор, болгар перец ва баклажанну цивппа бувгьуну бивкIсса кIанай.

Р.S. Агарда, бюхълай бухьурча, дачалий ягу хъув чIун-чIумуй уртту-сидерат (шанчIапIи, люцерна ва м.ц.) дугьлансса аьрщарал парча бивтун хъинссар. Ми ур­ттурал аьрщи дигьалаган дувай­ссар, му гихуннай ахънилсса ххя­ххан дуллансса гужирал дуцIин дувайссар.
Сидерат-уртту хъанахъиссар цIинцI-уртту хьун къаритлати­сса, ахънилсса дугьан хьхьичI аьрщи мюнпатсса затирттал ду­ччин дуван дугьайсса ххяххияну, ми ккалли дувайссар щюлли оьргъашиврун.

ХIадур бувссар
Бадрижамал Аьлиевал