Вай гьантрай МахIачкъалалив, Родопский бульварданий, лавайсса даражалий хьунни «Дагестан» РГВК-лул гьану бивзун 20 шин шаврин хас дурсса «Дагестан Fest» фестиваль. Щалагу Пушкина кучалий тIивтIуну бия личIи-личIисса майданну. Най бия спортрал тIуркIурду, сурат дишаврил, къавтIаврил, тIахIунтту даврил мастер-класс. Гьарица чулуха най дия нахIусса дукралул кьанкь. МахIачкъала шагьрулул цIанихсса рестораннал цIигьуртал ккаккан буллай бия дукра даврил мастер-классру. Бия чIявусса туристъталгу.
Андриана Аьбдуллаева
Фестивальданий гьуртту хьун бувкIун бия МахIачкъалаллал мэр Юсуп Умавов, Дагъусттаннал культуралул министр Зарема Буттаева, Дагъусттаннал туризмалул министр Эмин Мерданов, Информациялул ва печатьрал агентствалул хъунама Аьбдуразакь Жамалуттинов, ванал хъиривчу Наида МахIаммадова.
Жугу тIивтIуну буссияв «Илчи» кказитрал майдан. ЖучIанма бувкIми хъамалу буллай буссияв Зам-зам щинай. Дирзун самоваргу, рутIлай буссияв, нахIува-нахIусса аьрайн гьавккурттахунсса, чяй.
Жул майдандалия чан хъанай бакъая хъамал. «Илчилул» баннерданул чIарах цучIав къуккайва. ЖучIан най бия кказит ххирамигу, миллат ххирамигу, цайми миллатирттаясса дусталгу, тамаша буллалисса туристъталгу. Кказит чичин ччинан шиккува кказитругу чичлай бивкIру.
«Илчи» кказитрал хъамаллуравух бия Зарема Буттаева, Наида МахIаммадова, ПаччахIлугърал Думалул депутатнал кумагчи Зубайру Зубайруев, Дунияллул чемпион Рамазан Рамазанов, ДР-лул Халкьуннал мажлисрал депутат Эссенбулат МахIаммадов, Дагъусттаннал Композитортурал союзрал председатель Рамазан Фаталиев, Сириянавусса дагъусттанчу Шафи Акушали, ДГУ-рал профессор МахIаммадбаг ХIусайханов, Дагъусттаннал предпринимательствалул ва инвестициярттал агентствалул хъунаманал хъиривчу ХIажи ХIажиев, Москавлия увкIсса журналист Зураб КьурбанмахIаммадов, Дагъусттаннал халкьуннал артист МухIсин Камалов, МахIачкъалаллал Жагьилтурал центрданул директор Ися Рамазанов ва м.ц. Гьай-гьай, байрандалул сакиншинначитуран ва хъамаллуран жу итталун багьунну. КIицI лаган, республикалул кказитирттава фестивальданий гьуртту хьунни так «Илчи» кказит. Цуппагу чIаланну, яргну.
«Илчи» кказитрал коллективрахь дакIнийхтунусса барчаллагь увкунни «Дагестан» РГВК-лул генеральный директор Камила ХIамзатовал.
– Зу ци караматруру. Зу гьулусан бунни аудитория, цила бикIайкун майшан кунни зула кказит. Зу ккаккан бунни буккултращалсса даву дайсса куц. Миксса къулагъас дансса, итталун дагьансса роликру дирхьунни соцсетирттаву, цайми миллатирттал инсанталгума «Илчи» чичара тIутIи бунни.
Зу ттун хъиннува ххира хьунну, – чивчунни ванил цала Телеграмм каналданий.
ВаницIун бакьлай Наида МахIаммадовалгу увкунни : «Мяйжаннугу, жула «Илчи» кказитрал коллективрал, редактор Руслан Къардашов бакIчину, ккаккан бунни цала даража. Архнияра итталун дагьлай дия вайннал стендгу, баннергу. Бюхттул зунттал мицIайн бивсса цала ттугъгума бия «ИлчилучIа». Гьай-гьай, кказит чичин гъан хъанахъиссагу, коллективращал дусшиву дан ччиссагу бия», – увкунни ванил.|
Фестиваль ларгунни лавайсса даражалий, мюрщимигу бялавхъун, хъунимигу бигьа лавгун. Жущагу бювхъунни фестивальданул лагрулий жула буккултращал хьунабакьин, махъ-ихтилатрай щябикIан, кказитрал дустал чIяву бан.
РS. Хъунмасса барчаллагь учин ччай бура «Илчи» кказитрал майдан хIадур бан кумаг бувсса, байран наниссаксса хIаллай жун кабакьу буллай, чIарату сукку къавхьусса Надир ва Замира Макьсудовхъахь. Бюхълай личIаннав.
Суратру ва видеортту дуссар жул телеграм каналданий
