ЧIивиния шинмай ттул «Илчи» кказитращал бур яла ххуйми асарду бавхIуну. Таний Гъумук дуклакисса чIумал на назмурду «ЧIимучIалттул» лажиндарайн гьан дайссия. Ссавур дакъа ялугьлай бикIайссияв ттулла назмурду рищуннин.
Ца заманнай (ттун духьунссия 9-10 шин) Земфира Шаллаева бувкIуна ПатIимат Рамазанова жучIан хъамалу бувцуну. Ганил ттул ниттихь увкуна, укун чIивисса оьрмулий ванил кунна назмурду чичайсса цама цучIав къаккавкссар куну. Ми махъру ттувун хъинну бювххуна. Бюхъай ганил на ххари бан куну бивкIун бикIан, амма мудан га хьунабакьаву дакIниву лирчIуна.
Шинну ларгуна. На ДГУ-рал чил мазурдил факультет къуртал бувсса чIумал, Миясат Щурпаева ттул ниттихь ттуя цIухлай бивкIун, ганихь бувсун бия, на дахьва даврих луглай бушиву. Миясатлул най бунува Качар АбачараевначIан оьвкуну, бувсун бия укунсса душ миккун редакциялийн къахъинав куну. Качар Абачараевналгу валлагь, циванни къахъинсса, мунил ппу МахIаммадгу райондалий хъинну хIурмат лавайсса инсаннихха, душгу мунан лайкьсса бухьунссарча, бухьхьу уча жучIан куну бия. Мукун хьуссар ттул «Илчилул» даврил ххуллул дайдихьу. Хъинну кумаг байссия ттун жула ккурклидуш Андрианалгу. Жу ца кабинетраву буссияв ттул гиккусса шиннардий. Мунин мудан барчаллагьрай бикIара. Микку дус хьуну, хIакьинусса кьинигу Бадрижамаллущалгу связьрай буссару мудан. Хъинну чIявусса, ххуй-ххуйсса, лайкьсса инсантуращал кIул хьуссара ттулла даву сававну.
Яла ттул аьрххи Германнавусса Мюнхеннал университетравун багьуна. Тихун Вольфганг Шульце тIисса профессорнащал лакку мазрал хъиривлаявуртту дуллалисса диссертациялул ялув зун лавгссияв. Танал ассистентну зий буссияв. Ттул пахру бикIайва дунияллийх цIа ларгсса Людвиг Максимиллианнул университетраву лакку мазраясса лекциярду ккалан. Амма тихун бачиннин хьхьичI ттун хъинну агьамсса цамургу иш хьуссия. Ттунма хъинну ххирасса, лакран чара-бакъа аьркинсса инсантал – Качар Абачараевна, ХIасан КIурухов, Руслан Башаев ва Тамара Закарьяева бусса передача ГТРК-лул студиялуву хьуссия. Ттун уттигу му диск лякъин ччайна дур. Цан чирча, ттун му ттула яла ххуймур коллективраясса дакIнийнбичаву дуну тIий.
«Илчилул» зузалт лакрал цIуртти бур. Ми кунма жулва миллатрай дакI цIуцIисса, инсан лавайсса даражалийн лахъарча ххари хъанай, лакран къумасса иш хьурча дакI аьтIутIисса инсантал чансса бухьунссар.
Германнаяр махъ ттул оьрму баххана хьуна, на Москавлий международная политикалуха зий буссияв. Аьрасатнал ва Германнал жагьилтурал форумрай каялувшиву дуллай 3 шин хьуссия. Ттул хъунама ва на Германнал Президент Йоахим Гауклущал хьунабакьингу бувцунав, таний Президентшиву дуллалисса Дмитрий Медведевлущалсса хьунабакьаврийнгу даврия тIайла бувккунав. ООН-нал Генеральная Ассамблеялул 66-мур сессиялийн Нью-Йоркрайн тIайла бувккунав. Цаймигу личIи -личIисса агьамсса иширттайнгу багьссара. Амма, чув бунугу, мудан «Илчилухсса» ва Лакку билаятрахсса ччаву чан къархьуссар. Москавлий чIявуну лакращал хьунабакьайссияв Дагъусттаннал культуралул центрданий. Мунил Президент Арсен Буйдалаевичгу лакрал ххаллилсса арс ур. Тукун дагъусттаннал халкьуннал дянивсса дахIавриха дакIнийхтуну зузисса инсантал Москавлий хъинну чанссар. Утти на Дубайлив бура, Аьрабнал Эмиратырдай, Гъумучатусса АхIмадхановхъал тухумраясса, лакраха цичIав къачIалачIисса, Моханнадлун бакIрайн багьну, ва арс Сурхай хъуна уллай.
Уттигу цал учин ччива барчаллагь куну ттулва оьрмулуву яла ххуймур коллективрахь – «Илчилул» редакциялухь. Зу ттун циняв мудан дакIнийссару, ххирами. Барчаллагь тай шиннардихлу.
Моханнад ва на дакIнийхтуну барча буллай буру зу юбилейращал. Зу ялу-ялун ххаллилсса даражалийн лахъаннав, кказит ккалаккисса ва, зу кунма, лакрай дакI цIуцIисса халкь жулва миллатраву чIяву баннав. ТIайлабацIу баннав зун давриву ва оьрмулуву. Къумассару ва юбилей зущал хьунадакьин къабюхълай тIий, амма мудан зущал буссару.
Нагу зул
Сагъират Ссунгъурова
ОАЭ, ш. Дубай
