Махъра-махъсса занг Гъумучиял школалий

Гьарцагу шинал Лакрал райондалул администрациялул каялувчитал ва зузалт лагай райондалул школарттайн Махъра-махъсса занглил байрандалийн, школа къуртал буллалими барча бан, миннахь ххуллухъин учин.

Гьарца школалул дур шиннардий цIакь хьусса ва байрандалун хасъсса хъин-хъинсса аьдатру. Гъумучиял школалий, гьарца шинал кунма, ва кьинигу школа къуртал буллалими чут-чутну бувккуна хIаятравун. Муния махъ бавцIуна линейкалий. Гихунмай шеърирдайну, балайрдайну барчаллагь тIий бия учительтурахь ва школалухь. ХIисав къархьуну къаличIлай дия миннал симаннайсса ххаришивугу, хъювусулшивугу.
Школалул 76-мур выпускрал оьрчIру барча буллай, директор Жяъпар Канкаевлул бувсуна гьашину школа къуртал буллалиминнал дуккавриву ва спортраву дурсса хьхьичIуннайшивурттая. Райондалул ва республикалул олимпиадарттай, конкурсирдай хьхьичIунсса кIанттурду бувгьусса Оьмаров Оьмардун, ХIусайнова ПатIиматлун, Бу­ттаева ТIагьиратлун, МахIаммадова ПатIиматлун, МахIаммадов Пайзуллагьлун, ЦIаххаев ХIалимлун ва хьхьичIунну дуклакисса оьрчIан дуллуна грамотарду. Бувсуна пробный экзамендалул къаоьккисса хIасиллу хьун дуршиву.
Цалва итталу хъуни хьусса оьрчIахь ххуллухъин тIисса ихтилатру бувуна, миннаву цалла дакI дирхьуну зий бивкIсса цалчинсса учительницахъал Гуля Ибрагьимовал ва Загьрат Куяевал, классирттай каялувшиву дуллалисса Барижат ХIасанаьлиевал, ПатIимат Аьлиевал, завуч Асият Айгуновал.
Оьрмулул кIи-шанбачIулул ххуллийн буклакисса, школа къуртал буллалими барча бан, ва оьлув­къусса заманалий, щаращисса дунияллий, цалвамур ххуллу лагу-лявкъуну, му бигу-битан бигьану къабикIантIишивугу кIицI лаглай, гьарца бивзсса шаттираву миннан тIайлабацIу чIа тIутIисса ихтилатру бувуна «Лакрал район» МР-данул бакIчи Юсуп МахIаммадовлул, КIулшиву дулаврил управлениялул каялувчи Явсупи ХIамзаевлул.
«Ци пиша язи бугьарчагу, цIанасса заманалунгу тIалавсса, халкьуннангу бусравсса даражалул пишакартал хьуннав зуяту. Кьадарданул зува чунмай бичирчагу, хьхьичIва-хьхьичI нину-ппу, яла зула хьхьичI бацIлай бивкIсса учительталгу дакIнийну, Лакку кIану бюхттул бансса агьлу букканнав зуяту», — увкуна Юсуп МахIаммадовлул. ЕГЭ-рал хIакъиравугу кIицI лавгуна ларгсса шинал Лакрал райондалий ЕГЭ-рал хIасиллу ххуйсса хьушиву, республикалул дянивсса баллдануяр лахъсса балл лавсшиву.
Нитти-буттахъал цIания школалул коллективрахь барчаллагьгу куну, школа къуртал буллалиминнан тIайлабацIу чIа увкуна прокурор Светозар Оьмаровлул ва райондалул цIу лещан дай идаралул каялувчи Марат АьбдурахIимовлул.
Ахирданий рирщуна Махъра-махъсса занг. Гихунмай школа къуртал буллалими бия куннал гьухърай кув тIайлабацIулул махъру чичлай.

——————————

Махъра-махъсса занг Гъумучиял лицейраву

Гъумучиял лицейравугу дур цилла аьдатру. Лицей къуртал буллалими чут-чутну бувккун бацIай лицейрал хIаятравусса дяъвилия зана къавхьуминнал аьпалун дацIан дурсса гьайкалданучIа. Яла лакку мазрай учай лицейрал хасъсса гимн.
Школалухь барчаллагь тIутIисса цала хъуними уссур­ссуннал байран лахъа-хъун дан линейкалий бацIай 7-мур класс­рал дуклаки оьрчIругу. Лицейрал 18-мур выпуск барча буллай, мунил директор МахIаммад Хъунбуттаевлул школа къуртал буллалиминнахь ххуллухъин тIисса ихтилатраву бувсуна лицей къуртал бувсса оьрчIал ххуйсса дуккаврихлу ва тарбиялухлу учительтурахь барчаллагь тIисса чагъарду гьарца шинал бучIайшиву ми дуклакисса лавайсса дуккаврил идарарттал хъуниминнал цIания. Барчаллагь увкуна мудан чIарав бацIлацIисса райондалул каялувчитурахь.
Ххуллухъиндарал махъру миннахь ялагу увкуна «Лакрал район» МР-данул бакIчи Юсуп МахIам­мадовлул, КIулшиву дулаврил управлениялул каялувчи Явсупи ХIамзаевлул.
Гъумучиял лицейраву лавайсса даражалул пишакартал зий бушиву кIицI лаглай, Явсупи ХIамзаевлул бувсуна гьашину «Учитель года» конкурсрай республикалул яла хьхьичIунсса 56 учительнал дянив 3-сса кIану бувгьушиву лицейраву биологиялул дарсру дихьлахьисса Асият ХIасановал. Лицей къуртал буллалими балайрдайну барчаллагь тIий бия учительтурахьгу, директортурахьгу, интернатрал зузалтрахьгу.
Гъумучиял школалийгу, лицейравугу Махъра-махъсса занглил байран чIюлу дуруна Гъумучиял оьрчIал магьирлугърал школалул къавтIалтрал.