Уттигъанну Ккуллал райондалул жямат социал чулуха буруччаврил буржру биттур бувайсса идаралул (хьхьичIава «собес» учайссия) цIусса бакIчи ивтунни – ХIасаннул арс Зураб МахIаммадов.
Зураб увссар 1981-ку шинал Ваччиял шяраву. Ваччиял дянивмур даражалул школа къуртал бувну махъ, 2003-ку шинал бувккуссар ДГУ-лул математикалул факультет. Мунияр махъ зий ивкIссар Ккуллал райондалул РКЦ-лий. 2005-ку шинал ва увцуну ур аьралуннаву къуллугъ буван. Армиялия учIайхту зий ивкIун ур МахIачкъалалив коммерциялул банкраву.
Мукуна Ккуллал райондалул жяматран социал чулухасса хIаллихшиннарду дузал дувайсса идаралул («Центр социального обслуживания населения») директоргу цIусса ивтунни – АхIмадлул арс Арсен ХIажиев. Арсен увссар 1976-ку шинал Ваччиял шяраву. Школа къуртал бувну махъ бувккуну бур Дагъусттаннал педуниверситет. Мунияр махъ зий ивкIссар Ваччав тренерну. Яла зий ивкIссар Ккуллал райондалул администрациялучIасса спортрал ва физкультуралул иширтталсса бувайсса отделданул бакIчину. Цаппара хIаллай зий уссия Ккуллал райондалул УО-лул бакIчинал хъиривманугу.
