Ккуллал райондалий Ваччиял шяраву бур хъинну ххуйну, ял­ттугу, вивхгу бакьин бувсса Аьрасатнал халкьуннал аслий­сса культуралул центр. Шикку дувай сайки циняв райондалий шай­сса тяхъашивуртту, хьунабакьавуртту, конференцияртту ва цаймигу мероприятияртту. Бур мукунма циняв 14-рагу шяраву культуралул центрду.

Ларгсса шинал Ккуллал райондалул фольклорданул коллектив гьуртту хьуссар апрельданул 26-нний Дарбантлив хьусса «Содружество» фестивальданий. ЧIяйннал шяравасса СутIаевхъал кулпатрал ансамбль гьур­тту хьуссар Сергокъалалив хьусса кулпатирттал дянивсса конкурсравух. Июньдалул 5-10-нний МахIачкъалалив най диркIсса дунияллул халкьуннал дянивсса «Каспий – берега дружбы» фестивальданийгу гьуртту хьуссар Ккуллал райондалул культуралул зузалтрал коллектив. Июньдалул 13-нний Лаващав хьусса халкьуннал балайрдал зональный фестивальданийгу гьур­тту хьуссар культуралул зузала ХIабибуллагь Кьурбанов. Августрал 8-нний Бархъаллал шяраву хьусса каруннах дувай кьайлул выставкалий гьурттугу хьуну, концертгу ккаккан дурссар Ккуллал райондалул культуралул 10 зузалал. Сентябрьданул 16-17-нний Ккуллал райондалиясса 16 культуралул зузала гьуртту хьуссар Дарбант шагьрулун 2000 шин хъанахъи­сса тяхъашивурттавух. Сентябрь зурул 26-нний Гъумук хьусса Ризкьичинал кьинилул байрандалий концертращал гьуртту хьу­ссар Ккуллал райондалул культуралул 5 зузала. Октябрьданул 20-нний МахIачкъалалив хьусса Аьрасатнал халкьуннал аслийсса культуралул центрдал дянив­сса конкурсравух гьуртту хьу­ссар Ккуллал райондалулмур центргу. Октябрьданул 22-нний Бущихъав хьусса «День кунака» байрандалий гьуртту хьу­ссар Ккуллал райондалул культуралул зузалт.
Октябрьданул 26-нний Ма­хIачкъалалив АхIмад-Хан Султаннун 95 шин там хъанахъи­сса шадлугърай гьуртту хьу­ссар «Вихлинка» ансамбль, балайчитал РайхIанат ХIажиева, ХIабибуллагь Кьурбанов.
Гьай-гьай, циняв кIицI дур­сса фестиваллая, конкурсирттая вай зана хьуссар личIи-личIисса бахшиширттащал, дипломирттащал, грамотарттащал.
КIицI дурсса давурттавух бакъагу, культуралул зузалт гьуртту хъанай бивкIссар шинал мутталий райондалул вив хъанай диркIсса фестиваллавух, конкурсирттавух, байраннавух, тяхъашивурттавух. КIицI дуван ччива миннувасса цаппара. Ххувшаву ларсун 70 шинан хас дур­сса байран, АхIмад-Хан Султаннун 95 шин хъанахъи­сса 1-мур ЦIувкIуллал шяраву хьусса байран. Мартрал 20-нний хьусса Интнил кьини». Октябрь зурул 7-нний Хъювхъиял шяраву хьу­сса «Авадан» фестиваль ва цаймигу тяхъашивуртту.
Лажин хIадур дурссар ХIажимурад ХIусайновлул