Ларгсса нюжмаркьини Гъумук хьунни «Зарница» тIисса щалагу Аьрасатнал аьрали ва спортрал тIуркIулул райондалулмур ятIап.Му хас бувну бия ялун гъан хъанахъисса Ххувшаврил байрандалун.
Зулайхат Тахакьаева
Муний гьуртту хьунни ряхва школалул командартту.
Гьуртту хъанахъиминнан тIайлабацIу чIа учин бувкIун бия райондалул бакIчинал цалчинма хъиривчу Абакар Къюннуев («Юнармия» тIисса щалагу Аьрасатнал аьралуннал ва ватан ххираминнал жяматийсса ккурандалул кIанттул отделениялул каялувчи), КIулшиву дулаврил управлениялул каялувчи Явсупи ХIамзаев, Лакрал ва Ккуллал районнал аьрали комиссар ХIасан Масуев, аьрали комиссариатрал отделениялул каялувчи Ажув Юсупов, школарттай ОБЖ-лул дарсру дихьлахьисса учительтал.
ТIуркIулул шартIру дия укунсса: ша бищун кIулшиву, ярагъ ишла баврил бюхъурду ва спортрал хIадуршинна.
Ахир хIасиллайн бувну ххув хьунни Гъумучиял школалул 1-мур команда. КIилчинмур кIану бувгьунни ГьунчIукьатIрал школалул командалул. Шамилчинмур кIану бувгьунни Гъумучиял школалул 2-мур командалул.
ХьхьичIунсса кIантту бувгьусса командарттан ва личIи-личIисса бяст-ччаллай хьхьичIун ливчусса гьурттучитуран буллунни дипломру, кубокру ва арцуйнусса бахшишру. Ххув хьусса команда гьуртту хьунтIиссар ва зурул 12-нний Шамилкъалалий (УнцIукIуллал район) хьунтIисса зоналул ятIапрайгу.
