ЦIуссалакрал райондалий Чапаевкаллал шяраву январь зурул 28-нний тIивтIунни шяравусса агьамсса масъаларттал хIакъиравусса батIавуртту ва цаймигу мажлисру буллансса къатри.

Вай къатри тIитIлатIисса ххарисса кьини шиккун бувкIун бия Дагъусттаннал БакIчинал ва ХIукуматрал администрациялул паччахIлугърал наградартталсса буллалисса управлениялул хъунама Исрапилов Артур Анварович, ЦIуссалакрал райондалул бакIчи Айдиев ХIажи Шихамирович, ДР-лул Халкьуннал Мажлисрал председательнал хъиривчу Давдиев Камил МахIаммадович, ДР-лул Халкьуннал Мажлисрал депутат Амирханов Амирхан АхIмадханович, МахIачкъалаллал шагьрулул Кировский райондалул хъунама Сагидов СалихI Камалович ва шяраваллил жямат.
ЦIуминалийн бивзсса агьалинан вай буниялагу дакъа чара бакъасса къатри хьунни. Аьркинсса ишираву жямат цачIун батIлансса, цачIу маслихIат ккак­лансса къатри даврил сиптачи ва хъунама спонсор хьунни Чапаевкаллал шяравасса, цинярдагу ЦIуссалакрал райондалий хъанахъисса мероприятиярттал чIарав ацIайсса, кабакьу буллалисса Исрапилов Артур Анварович. Чапаевкаллал жяматралгу, ванал пикрилуцIун бавкьуну, кумаг бунни кутIасса чIумул му­тталий ххаллилсса къатри дурну къуртал дан. Къатри даврил проект дуван тапшур бувну бия машгьурсса строитель Кабиев Аьбдулманап ХIусайновичлуйн. Ванал хIарачатрайну бувну бур 400 кв. метра дусса къатрал комплекс, цивугу чIявусса агьали батIинсса хъунмасса зал ва чак байсса къатта бусса.
Вай къатри дуллай чIарав бав­цIуминнахь, ка-кумаг бувминнахь ва цинявппагу шиккун бувкIсса хъамаллурахь барчаллагь тIутIисса ихтилат бунни Чапаевкаллал шяраваллил бакIчи МахIаммадпаша Аьбдуллаевлул.
— Уку-укунсса давуртталли дусшивугу, кувннал кувннащалсса хIала-гьурттушиврийсса арардугу цIакь дайсса, шяраваллил багьу-бизугу ххуй байсса, — тIий, рязийну ихтилатру буллай бия цинявппагу ва кьини шиккун бавтIми.