«Жу – Ххувшаврил варисталлу» («Мы – наследники Победы») тIисса цIанилусса хъинну ххуйсса даву дайдирхьунни Ккуллал райондалий. Ккуллал райондалул муниципал сакиншиннарал администрациялул хIадур бувну, райондалийсса гьарца школалун ва шяраваллал кIанттул сакиншиннардин тапшур бунни Ххувшаврил Ттугълил копия. Вай ттугъру гьарца байраннай Аьрасатнал, Дагъус­ттаннал ттугъру бищайсса кIанттай бищавантIиссар. Му бакъагу, ялув кIицI дурсса даву дачин дунни гьарца шяраваллаву.
Ххувшаврил Ттугълищал шяраваллан тапшур бувунни «Книга памяти правнуков Победы» тIисса лу. Ва луттираву гьарца шяраваллил чичинтIиссар цала шярава дяъвилийн лавгсса инсантурал цIарду. Му даву дуван ккаккан бувну бур 4-5 кьинилул дянив, шяраваллаву яхъанахъисса инсантурал сияхI хIисавну. Даву дайдирхьунни Дагъусттаннал БакIчинал зунттал районнайсса вакил М. Зайналаьбидов Ккуллал райондалийн увкIсса кьини.
Цалчин Ххувшаврил Ттугъ ва Аьпалул лу тапшур бувуна Хъусращиял шяраваллин. Галстукру бавхIусса, чIюлусса яннардавусса оьрчIал кьамул бувуна Ттугъ ва Аьпалул лу.
Вай гьантрай тIурча Хъусращиял шяраваллил Ххувшаврил ттугъ ва Аьпалул лу эстафеталий тапшур бунни Ккуллал шяраваллийн. Ва даву къуртал хьун тIий дур апрельданул 30-нний Ваччиял шяраваллил дузал дурсса давурттайну. Яла Аьпалул лу Ваччавсса райондалул музейраву бишин тIий бур.
ТIайлабацIусса давуртту хьуннав.