Жагьилтурал кьинилун хIисав дувай 27-мур июньдалул кьини. Ва кьини шагьрурдай ва шяраваллаву дувай тяхъашивуртту, спортрал бяст-ччаллу. Цакьнивагу кIицI бував, Ккуллал райондалий хъуннасса къулагъас дуллай бур ялун нанисса ник чурххал уркьатну тарбия даврил иширттах.
Райондалий бувай волейболданул, лачIунбуккаврил, лечаврил, чару личаврил ва цаймигу спортрал тIуркIурду. Июньдалул 27-нний райондалий «Наследие» фестиваль душаврийн бувну, Жагьилтурал кьинилун хас дурсса, райондалий цалчин хьусса, велосипедру ссур дуваврил бяст-ччаллу бунни июньдалул 26-нний.

Гьашинусса гъидайдихьу­лул кьинирдугу хъинну ххуй­сса, кIиришиву дакъасса, тIабиаьтравусса гьава, уртту-тIутIая нанисса, ишттахIсса кьункьал буцIин бувсса хьунни. Бяст-ччал буван бувкIсса школардал оьрчIая байбивхьуну, 60 шинавату ливчу­сса арамтурайн бияннин, янилун багьлагьисса гьурттучитурал чур­ххардивунна зунттал авкьатшиву дутлатишиву тасттикь хъанай бия.
Бяст-ччаллавух гьуртту хъанахъими бавчIуну бия 4 группалийх: 1-мур – 16 шинавун бияннинсса; 2-мур – 30 шинавун бияннинсса; 3-мур – 45 шинавун бияннинсса; 4-мур – 45 шинаяр тинмайми. Цалчинмур группалул велосипед ссур дуруна 5 километралийх, кIилчинмур-шамилчинминнул – 10 километралийх, мукьилчинмунил – 3 километралийх . Велосипед ссур дувавриву ххув хьуна хъирив кIицI бувсса спортсментал:
— Цалчинмур группалуву: 1. Гъазиев Аьлил (Ккул). 2. Маммаев Жяъпар (Ккул). 3. Оьмаров Юсуп (Ккул);
— КIилчинмуниву: 1. Куйчиев Оьмар (Ккул). 2. Умаров Аьли (ЧIяйми). Мирзаев Амир (Ккул);
— Шамилчинмуниву: 1. ХIажиев Арсен (Ваччи). 2. Камалов Карин (Ккул). 3. Кьадинаев АьвдурахIман (Ккул);
— Мукьилчинмуниву: 1. Шамхалов Мажид (Ккул). 2. МахIаммадов Рашид ( Ккул). 3. Маммаев Шипауттин (ЦIуйши).
Ххувшаву ларсъсса спортсментал барча баву, вайннан дипломру, медаллу ва арцуйнусса бахшишру дулаву хьуна ЧIяйннал аэродромрай. Спортсментал барча буллай, вайннан бахшишру дуллалавриву гьуртту хьуна: Ккуллал райондалул муниципал сакиншиннарал бакIчи Сяид Сулайманов, ванал хъиривчутал Хизри Мутаев, Эдуард ХIажиев, Сабрина Илиясова, райондалул администрациялул Информациялул ва аналитикалул отделданул бакIчи Рамазан Маммаев ва цаймигу администрациялул къуллугъчитал. Соревнованиярттавух гьуртту хьусса, амма хьхьичIунсса кIантту бугьан къавхьусса, яла чIивима ва яла угьарама гьурттучинангу дуллуна бахшишру ва дип­ломру. Аьмну цалчинмур кIану бувгьусса Ккуллал шяраваллил командалунгу буллуна диплом. Шиккува Сяид ХIасниевичлул увкунни:
— Уттигъанну ахиратравун лавгсса, Ккуллал шяравасса, Дагъус­ал депутат Чупалов Оьмаровлул гъан-маччассаннал баян бунни, октябрьданул 5-нний 2014-ку шинал, Ккуллал райондалий дикIантIишиву Чупалав Оьмаровлул цIанийсса соревнованияртту (велосипедру ссур даврил). Му кьини дур аьпа биву Чупалав Оьмаров увсса кьини. Мунийн бувну, гьуртту хьун ччиминнан на баян буллай ура уттива хIадур хъанан аьркиншиву», — куну.
Жагьилтуран гьарца ишираву тIайлабацIу чIа тIисса махъ лахъаву дуруна Рамазан Маммаевлул ва цайминнал. Ванийну га кьинисса соревнованияртту къуртал хьуна.