Июль зурул 3-нний Дагъусттаннал жагьилтурал иширтталсса буллалисса министр Заур Кьурбанов ивунни ЦIуссалаккуйн, райондалул жагьилтуращал хьунаакьиншиврул.
Мунал хъунмасса барчаллагь увкунни райондалул хъунама ХIажи Айдиевлухь, жагьилтурал политикалул комитетрай каялувшиву дуванма увчIин министерствалийн вихшала даврихлу. «Ва Жагьилтурал иширтталсса буллалисса министерствалул ва муниципал сакиншиннарал, жагьилтурал даврилсса буллансса кандидатура ххалдигьлагьисса, цачIусса даврил цалчинсса опытри. Райондалул хъуниминнангу жагьилтурал масъалартту сантирай щаллу буллансса бюхъулул заллур увчIуну ччисса, жунгу ххуйну зунтIисса инсаннайнни ва даву тапшур дуван ччисса, мунияту райондалул администрациялущал уртакьну зий буру», — увкунни министрнал. Райондалул администрациялул баян бувссия жагьилтурал иширтталсса буллантIисса комитетрал хъунама увчIлачIисса конкурс. Уттинин 6 аьрза буллуну бур му къуллугърай бацIан ччиминнал. Заур Кьурбанов ва ХIажи Айдиев гьурттуну, му конкурсрал цалчинмур ятIап дунни. ХIажи Айдиевлул кIицI лавгунни Жагьилтурал министерствалущал маслихIат ккавккун цIакь увантIишиву райондалул жагьилтурал къайгъурдалсса буллантIима. Бувсунни цува конкурсраву ххув хьуманал чIарав ацIан хIадурну ушиву. Мунал барчаллагь увкунни райондалийн увкIсса министр Заур Кьурбановлухьгу.
