Февраль зурул 20-нний Ккуллал райондалул УО-лул къатраву хьунни райондалул школарттайсса ххисса кIулшиву дулайсса идарарттайн заназисса оьрчIал дурмунил выставка. Шикку дия кIивкIусса хIайвандалул бурчуя, тIаннуя, чагъардая, жанграя дурсса кьай-кьуй, дирхьусса суратру. Ва выставка ккалли хъанай дусса дия Аьрасатнаву нанисса «ЧIава техниктал ва изобретательтал» тIисса конкурсрал 1-мур этапран.
ОьрчIал дурмунин кьимат бишлашисса жюрилувух бия: УО-лул каялувчи ХIаммакуева Альбина, УО-лул пишакартал Амиров Артур, ХIусайнов Юсуп, оьрчIал творчествалул къатлул методистътал Оьмарова РайхIанат ва Кьурбайтаева София.
Ахирданий дуруна укунсса жямру: цалчинмур кIану буллуна Ккуллал 1-мур школалул 11-мур классрал дуклаки душваран – Мутаева Муъминатлун ва ХIасанова Кьурбанкъизлун, бартукьирах ва чагъардая бувсса гунгунттух; кIилчинмур кIану буллуна Хъусращиял школалул дуклаки оьрчIан Г. ХIажиевлун ва Р. Сиражуттиновлун, тIаннуя дурсса, щин ласайсса ккулданух; шамилчинмур кIану буллуна Ккуллал 1-мур школалул 4-мур классрал душваран, ппалул ххаллая бувсса жанавартрах.
ХIадур бувссар
ХIажимурад ХIусайновлул
