Июньдалул 30-нний Ккуллал райондалул администрациялуву хьунни Ккуллал райондалул дуклаки оьрчIал ЕГЭ дулаврил жям дуллалисса батIаву. Муний гьуртту хьунни Ккуллал райондалул бакIчи Сулайманов Сяид, депутатътурал собраниялул председатель Оьмаров Гъази, УО-лул хъунмур ХIаммакуева Альбина, школардал директортал, завучтал ва цаймигу къуллугъчитал.
Агьаммур ихтилат байбишиннин, Сулайманов Сяидлул гьашину мусил медальлайну школа къуртал бувсса оьрчIан медальлу, барчаллагьрал чагъарду, арцуйнусса бахшишру дуллуна: Мутаева Саидатлун, ХIалимова Майсаратлун, Мудунова ХIабибатлун – Ккуллал 1-мур школа; ХIусайнова Аминатлун, МахIаммадов Шамиллун, Рамазанова Ххадижатлун, Исакьов АхIмадлун – Ккуллал 2-мур школа; Аьбдуллаева Аринан – 2-мур ЦIувкIуллал школа. Вайннавату МахIаммадов Шамиллуща ва Исакьов АхIмадлуща батIаврийн бучIан къавхьуну, вайннал медальлу, бахшишру ниттихьхьун ва школалул директорнахьхьун дуллуна.
ХIаммакуева Альбинал бувсуна цукун ларгссарив райондалий ЕГЭ дулаврил давурттив. Иширах бургарча, дукIунияр ЕГЭ дулаву гьашину хъинну хьхьарану ларгун чIалай дия. Ванил кIицI бувна, экзаменну дуллалисса классраву дурсса диялдакъашивуртту хIисавравун ларсун, 5 оьрчIал давурттив федерал хъирив ацIул аннулировать дуршиву, кIилчин экзамен дулунсса ихтияргу кьуркьуну.
Экзаменнайн итаавкьусса, школа къуртал буллалисса 90 оьрчI усса ия. ХIаммакуевал ихтилатрава чIалан бивкIуна яла чанну ласун багьайсса баллу къалавсшиву оьрус мазрал 15-ннал, математикалул 10-ннал, химиялул 5-ннал, биологиялул 7-ннал, историялул 8-ннал. Укунмасса иш бия гайми экзаменналгу. Цинярда дуллалисса экзаменну диркIун дия 10.
ХIаммакуевал кIицI бувуна хъинну хьхьарану най душиву оьрчIру экзаменнайн хIадур бувайсса давурттив, дакъашиву школалул ва оьрчIал нитти-буттахъал дянив дахIаву. Гьаз буллалисса масъаларттан хас бувсса ихтилатру бувна ЦIуйшиял, Вихьуллал, 2-мур ЦIувкIуллал школардал директортурал.
БатIаврил ахирданий цалва ихтилатраву аьй-бювкьу дурна Сяид Сулаймановлул школалул директортурай, завучтурай, УО-лул методический кабинетрал давурттай. Шиккува ванал кIицI бувна ванийну дуккаврил шинал жям дуллалисса ихтилат къуртал къахъанахъишиву, цIусса дуккаврил шин дайдишиннин уттигу цал, куртIну ци дуван багьлай бивкIун бурив ххалбигьлагьисса, батIаву дувантIишиву.
