Дуклаки оьрчIан дагъус­тта­ннал литературалул ирс ла­хьхьаву мурадрай ва, мунищалва архIал, миннаву творчествалул бюхъурду аьч баву мурадрай, гьарца шинал Ниттил мазрал кьинилул хьунийн Лакрал райондалул КIулшиву дулаврил управлениялул дуклаки оьрчIал дянив бай Дагъусттаннал шаэртурал назмурду дакIних дуккаврил конкурс.

Вай гьантрайгу хьунни дуклаки оьрчIал лакку мазрай Дагъусттаннал язими шаэртурал назмурду дакIних ду­ккаврил конкурс.
Конкурс тIитIлай, КIулшиву дулаврил управлениялул лакку мазрал методобъединениялул хъунмур Каминат Буттаевал бувсуна гьарцагу шинал ва конкурсрай райондалул дуклаки оьрчIал чялишсса гьурттушинна дайшиву. Гьашинугу муний гьуртту хьунни райондалул 16 школалул дуклаки оьрчIру. Конкурс бия кIибавчIуну: 11-ми классирттал дуклаки оьрчIал дянив ва 7-9 классирттал дуклаки оьрчIал дянив.
Конкурсрай ккалаккисса наз­мурду чIяруми дия МахIаммад-Загьид Аминовлул, Расул ХIам­затовлул, АбутIалиб Гъапуровлул, Абачара ХIусайнаевлул, Мирза МахIаммадовлул, Юсуп Ххаппалаевлул, Апанни Къапиевлул.
Конкурсрай гьуртту хъана­хъиминнан кьимат бищавриву жюрилул хIисавравун ласлай бия наз­му пасихIну, вичIи дирхьуминнан дюхханну ва мяъна-мурад лаласун бюхъанну дакIних дуккаву.
11-ми классирттал дянив 1-мур кIану бувгьунни Ккурккуллал школалул дуклаки душ А. Гъужиевал (учитель Магьдиева — ); 2-мур кIану — Гъумучиял школалул дуклаки душ Г. Учуевал (учитель Аьлиева ПатIимат) ва Гъумучиял лицейрал дуклаки душ С. МахIаммадовал (учитель Исмяилов Аьвдулмажид); 3-мур кIану – КIундиннал школалул дуклаки душ З. Аьбдуллаевал (учитель Шихлаева Абризат).
7-9-ми классирттал дуклаки оьрчIал дянив 1-мур кIану бувгьунни Хъунайннал школалул 9-мур класс­рал дуклаки оьрчI С. ХIасановлул (учитель Д. ХIасанова); 2-мур кIану – Кумиял школалул 8-мур классрал дуклаки душ К. Оьма­ровал (учитель А. СалихIова); 3-мур кIану – ЧIурттащиял школалул 8-мур классрал дуклаки душ М. Михитаевал (учитель М. Кьадиров) ва ШавкIуллал школалул 9-мур классрал дуклаки душ С. Мурадовал (учитель Какваева Дайганат).
Конкурсрай ххув хьусса ва хьхьичIунсса кIантту бувгьусса оьрчIан ва миннал учительтуран кIулшиву дулаврил управлениялул чулуха дуллунни ХIурматрал грамотарду.
Лажин хIадур дурссар
Зулайхат Тахакьаевал