Ларгсса шинал декабрьданул 29-нний Ккуллал райондалул жяматрал хIурматрай хьунабавкьуна уттигъанну дунияллул чемпионтал хьусса ЦIуйшиял шяравасса Абачараев Рамазан ва Къяннал шяравасса ХIажимахIаммадов НурмахIаммад.Абачараев Рамазан греко-римуллал лачIун уккавриву хьуну ур Аьрасатнал чемпион, Европанал миллатирттал зава ларсману ва дунияллул чемпион. ХIажимахIаммадов НурмахIаммад хьуну ур кикбоксинграл спортрал Аьрасатнал Аьралий гужирдал шамила чемпион, Дянивмур Федерал округрал чемпион, СНГ-лул зава ларсма, Европанал чемпион, ка хIала даркьусса ияврил дунияллул чемпион.
Чемпионтал хьунабавкьуна ЧIяйннал шяраваллил лултту нанисса ххуллул чIарав дирхьусса СССР-данул Виричу ЦIаххай Маккаевлул гьайкалданучIа. Хьунабакьаву хьуна ччатI-нисиращалсса. Чемпионтуращал бия вайннал ппухълугу – Рамазаннул бутта Арслан ва НурмахIаммадлул бутта Энгелс. Бия гъан-маччамигу. ЧIюлуну миллатрал лаххиялуву гай хьунабакьин бувкIсса ЧIяйннал школалул душру къавтIун бивзуна чемпионтуращал ва рирщуна суратру хъамакъабитулун. Чемпионтал хьунабакьлакьиминнавух бия Ккуллал райондалул бакIчи Сяид Сулайманов, ванал хъиривми ва райондалул къуллугъчитал.
Гания махъ чемпионтал лавгуна Ккуллал райондалул администрациялул къатравунгу, райондалул Культуралул къатлувунгу. Гиккун бавтIун бия дуклаки оьрчIру, идарарттал вакилтал, шяраваллал делегацияртту ва цаймигу инсантал.
Гикку бусравсса хъамаллуран хас бувсса махъгу лавхъун, райондалул бакIчинал чемпионтурал хъачIунттайн бувтуна кIяласса аьнди варсив ва бакIрай бивхьуна чурчари кьяпри. Буллуна мукунма гайннахьхьун арцу дусса конвертругу. Махъру лавхъуна ялагу ЦIуйшиял шяраваллил школалул директор ПаттахIов ПаттахIлул, Ккуллал райондалул музейрал директор Абакаров ТIагьирдул. Мунал ЦIуйшиял СПК-лул чулуха Абачараев Рамазаннун балчан бахшиш буллалишивугу бувсун, хьхьури канихьхьун дуллуна. Махъру лавхъуна мукунма чемпионтурал буттахъал Арсланнул ва Энгелслулгу.
Гания махъ райондалул майданнив бацIан бувсса елкалул лагмасса тяхъашивурттавух гьуртту хьуна цинявппагу. Ккаккан дурна райондалул культурал зузалтрал хъинну ххуйсса концерт.
