Ккуллал райондалул КIулшиву дулаврил управлениялул хъунмур ХIаммакуева Альбина ХIажиевнащалсса ихтилат.
— Альбина ХIажиевнай, цукунсса дия райондалийсса школардан ва дуккаврил шин?
— Ларгсса шинах бурувгун, ттухьва цIуххирча, райондалийсса школардай дуккаврил шин ххуйну ларгунни.
Цинявппагу школардай дуклай ия 942 оьрчI. ТIайлар, шиная шинайн дуклаки оьрчIал сияхI чан хъанай дур. Жагьилсса кулпатру шагьрулийнмай бизлай бур.
Ккуллал райондалий бур 14 школа. Дуккаврил шинал лахъишиврий школардай хьуссар 18-рагу предметрал дарсирдал мастер-класс. Мунин жу ялагу метобучение учару. Ми дарсирдай гьуртту хъанай бивкIссар цайми школардал учительталгу. Махъ дурссар дарсирал анализ.
Ялагу жу дурссар, школардал ва дуклаки оьрчIал дянив, личIи-личIисса конкурсру, олимпиадартту. Райондалул учительтал ва дуклаки оьрчIру гьуртту хьуссар республикалул циняв конкурсирттавух, олимпиадарттавух, зана хьуссар хьхьичIунсса кIантту бувгьуну.
— ЕГЭ дулаврил, школа къуртал баврил иш-тагьар цукун хьур?
— Гьашину райондалий 11-мур класс къуртал бувссар 73 оьрчIал. Вай бакъагу, ларгсса шиннардий школарду къуртал бувсса 6 оьрчI ия экзаменну дуллай. Дуллунни цинявннал. 73 оьрчIава мусил медалданущал 11 класс къуртал бунни 14 дуклаки оьрчIал. Ми хъанай бур 19% школа къуртал бувсса оьрчIал. Ванил чIалачIи буллалиссар жулла райондалий дарсру дишаврил чулуха пагьму-гьунар бусса учительтал чIявусса бушиву. На рязиссара ва ишираяту. Ялагу, 9 класс къуртал буллалисса 98 дуклаки оьрчI ия.
На барча буллай бура учительтал ва дуклаки оьрчIру дуккаврил шин къуртал даврищал. ЧIа тIий бура миннан цала дакIнил лавсъсса пиша язи бугьансса тIайлабацIуртту.
Ихтилат бувссар ХIажимурад ХIусайновлул
