Лагавай дур дуклаки оьрчIал гъинттулсса бигьалагай кьинирду. ТIитIавай дур школардал нузру. Яла хIазмур, асардал ва хияллал ахир-зума дакъасса чIун. Ккуллал райондалийсса школарду цукун хIадур хъанай буссарив дуккаврил шинайннин бувсунни Ккуллал райондалул УО-лул хъунмур ХIаммакуева Альбина ХIажиевнал.
— Ккуллал райондалий бур кIулшиву дулайсса 26 учреждения. Миннувату 15 школа, 5 оьрчIал багъ, 6 ялунсса кIулшиву дулайсса школа бур. Ялунсса кIулшиву дулайсса школардуну хъанахъиссар: Ккулувсса, Вихьливсса спортшколарду, 1-мур ЦIувкIравсса пагьламантурал школа, Вихьливсса искусствалул школа, Хъусрахьсса оьрчIал музыкалул школа, Ваччавсса оьрчIал творчествалул Къатта. Гьашину дуккаврил шин къуртал дуллалисса чIумалсса циняв дуклаки оьрчIал сияхI дия 1017 оьрчI. Вайннавату 90 оьрчIал къуртал бувссар 11-мур класс, 99 оьрчIал къуртал бувссар 9-мур класс. Мунияту цими оьрчI икIанссарив школардай кIул хьун бувар. Жу циняв кIулшиву дулайсса учрежденияртту ххалбувссар марцIшиврул, цIудагьаврил ва ремонт даврил чулуха, ми цукун хIадур хьуну бурив дуккаврил шин дайдишиннин. Ттущал школарду ххал буллай буссия Ккуллал райондалул Роспотребнадзорданул хъунама хIакин Тариев ХIажикьурбан ва цIу къадагьан дитаврил инспекциялул хъунама МахIаммадов Басир. Шиккува кIицI буван ччива, школарду дуккаврил шинайннин бакьин бувансса арцу уттигу райондалийн къадучIаврийн бувну, школарду ремонт бувссар директортурал цалла арцух, яла махъ, арцу райондалийн дучIайхту, зана дувансса нанижатрай. Циняв учрежденияртту хIадурну бия. Анжагъ 4 школа бия цила кIанийн къабувтун. Вайннахьхьун 10 гьантта буллуссар диялдакъашивуртту дузал дуван. Учиннуча ттукIрал ххаллу чIалачIисса, розетка ххуйну цIакь къадурсса ва вайннуха лархьхьусса мюрш-кьюршсса диялдакъашивуртту дия.
Гьашину Ккуллал райондалий хъинну хъуннасса уттарашиву дикIан тIий дур дуккаврил шинал дайдихьулий. Ваччав тIитIлатIиссар цIусса, уттизаманнул циняв тIалавшиннарду дузал дурсса, дянивмур даражалул, 200 оьрчIансса, школа. Хъювхъиял шяраву хьхьичIва бивкIсса, амма махъсса шиннардий зий къабивкIсса оьрчIал багъ, шяраваллил чиваркIуннал цалва бакьин бувну, цIуну тIитIлатIиссар. Ва бакьин буван, шивун аьркинсса кьай-кьуй ласун инсантурал харж дунни сайки миллиондалува лирчусса арцу. Хъунмасса барчаллагь Хъювхъиял чиваркIуннан, цалва ялун бучIантIимур кIулну, шяраваллил буруккинтту дузал буллалаврихлу. Ва оьрчIал багъ шяравусса школалуцIунссану хъанахъиссар. Ванин цIа дикIантIиссар «Хайхинская основная общеобразовательная школа-детский сад «Теремок».
Мукунма Хъусращиял шяравусса оьрчIал багъраву буссия ца группа. Шяраваллил нитти-буттахъал арцу дартIун, ца группа уттигу тIитIинсса къатта хIасул буллай буссар. Ца группалуву бикIайссар 15 оьрчI. Октябрь зуруя гихунмай шяраваллавусса школардайн оьрчIал багъирдал итабавкьусса 6 шинава ливчусса оьрчIру ххуллун кьинирдай занантIиссар буккин-чичин лахьхьиннинсса хIадуршинна дуллан. Вайннахь дарс дихьлантIиссар байбихьулул школардал учительтал. Гьай-гьай, Ваччавсса школа тIитIайхту, райондалий гьарта-гьарзасса дахханашивуртту хьун тIий дур. Ми дувансса хIадуршиннарду уттигу найнна дуссар. Августрал 27-нний циняв школардал директортурал аттестация буссар. Хъиривмур кьини дуссар аьдатравун дагьсса августовский совещание, — буслай бур ва.
Альбина ХIажиевнащал ихтилат бувайхту, на лавгссияв Ваччавсса школалий дуллалисса давурттах ябитан. Миннуя ттухь бувсуна ва школалул директор Мирзаева Бажи АхIмадлул душнил:
— ЦIана школалул хIаятраву зий дур грейдер. Классирттал, коридордал чIирттайн лахълай буру наглядный пособияртту, доскарду. Классирттаву дирхьуну дуссар партарду, дарс дихьлахьиний ишла дувайсса кьай-кьуй. Хъинну ххуйну чIюлу дурсса суратирттащалсса, тIабиаьтрая, дунияллул бутIрайсса хIукуматирттая, динная, караматшивурттая бусласисса баннерду ккаларчагума, мадарасса кIулшиву хъанантIиссар оьрчIал, — тIий бур ва.
Мяйжаннугу Бажи АхIмадовнащал нава школалул классирттавух заназисса чIумал, шиккусса ххуйшивурттал, дузалшивурттал цIунила-цIунил школалийн занан ччивахха тIисса асар хIасул буллай бия. Бунияласса кIулшиву дулаврил чIалъаь хьуну бия.
