ЦIуллу-сагъшивруцIунсса маслихIатру

КIулну бур жура ишла дайсса цаппара дуки-хIачIиялул кумаграйнугу урандалул (ракрал) цIуцIаврийнгума къаршину бацIан шайшиву. Хъамамабитари, вай лув кIицI ларгсса дукия зулла рациондалуву мудангу ишлану дикIан аьркиншиву.

1. Къур
Къур бета-каротиндалул мяъданни, гужсса антиоксидант­ри. Ванил урандалул клеткарду гьарза хьун къабитай­сса бур. Хайр бусса дур уттарасса къургу, мукунна шархьмургу.

2. Сельдерей
Аьлимтурал ххал бигьавурттайн бувну, сельдерей урттул ххуйну кумаг байсса бур инсан хъазамрал, ганз ххюттул, лякьлулусса железалул дурухлурдая уруччин. Шиккува учин, сельдерей хъинну дакьайссар ччимур салатравугу.

3. Калан
Каландалул цинявппагу журардаву (брокколилуву хъиннува) бусса бур дурухлулул клеткарду литIун байсса глюкозинолаты. Ишла буллалияра каландалул цинявппагу журарду (ятIулсса, кIяласса, брокколи ва м.ц.).

4. НухутI-хъюрув
Шиву гьарзассар селен, ва хъинссар селен ттиликIран, кумаг байссар инсаннал организмалува аьркин дакъамур дуккан дан.
Чурххаву селен биялну би­кIаншиврул нюжмардий цаллагу нухутI хъюрув хIаласса дук­ра дуркуну хъинссар.

5. НицI
НицIал цила нирхирай дитайссар, цIакь дайссар иммундалул система. Иммунитет цIакьсса инсаннан вирусирттая, бактериярттая нигьачIаву дакъассар. ЦIакьсса иммунитет дусса организмалущар захIматсса азарданийн гьужум бан шайсса, мукунсса клеткарду чIяву хъанан­сса мадад къабулайсса, цIуцIаву дайдихьулийра бас дувайсса. Мунияту гьантлун ца къуса ни­цIал канакисса инсаннал цала цIуллушиву дуручлачиссар.

6. Зайтундалул нагь (оливковое масло)
Зайтундалул нагь ца яла на­хIумур ва хайр бумурди салат­равун дутIин. Му бакъассагу, хъинну гужсса антиоксидантри, инсан сатиржан шаврия, дурухлурдая уруччайсса.
Яла ххуймур зайтундалул нагь – му цалчин хьхьирцIумурди (кIиришивугу ишла къадурну).

7. ЧIикIунтIа
Винегретрал ва боршрал гьануну хъанахъисса чIикIунтIалул тIин-тIааьнгу, ваниясса хайргу къакIулсса акъахьунссар.
ЧIикIунтIалул сантирайн дутай­ссар ххютту-канил, тти­ликIрал даву, ­оьттул состав ххуй дайссар. Вания кумаг хъунма­ссар инсан ракрая уруччаврингу. Так чIикIунтIа мудан канан аьркинссар. БучIиссар салатру дуллан, шархьунгу, ша­къархьунгу. БучIиссар сок дурну хIачIангу. Так сок дурну 3 ссят ларгун махъ дакъа хIачIан къабучIиссар.
Гьай-гьай, кIицI дурцири дук­ра къахъанахъиссар ракрая­сса панацеянугу. Амма вайннул биялсса кумаг байссар мукун­сса цIуцIаврихьхьун мадад къабулун.

ЦIуллуну битаннав.
ХIадур бувссар
Т. ХIажиевал