Март зурул 26-нний Ккуллал райондалул Культуралул къатлуву хьунни Театрданул кьинилун хас дурсса шадлугъ. Шикку гьуртту хъанай бия Ккуллал райондалул шяраваллавусса магьирлугърал къатрачIасса кружокирттал гьурттучитал. Конкурсрал сиптачину ия Хъусращиял шяраваллил Халкьуннал театрданул режиссер Марсель Сулайманов.

Конкурсравух гьур­тту хъанай бия Вихьуллал,1-мур ЦIувкIуллал, ЧIяйннал, ЦIу­щаннил кружокирттал коллективру. Конкурс дайдишин хьхьичI Хъусращиял театрданул ккаккан дуруна халкьуннал пишардал аьдатру ядуллалисса дуссухун батIаву. Бия мукунма балайрду ва хъярчругу.
Яла байбивхьуна кружокирттал дянивсса бяст-ччаллу. Вихьуллал ккаккан бувуна «Асиятлул оьрмулул кьадар» тIисса спектакль. Роллу дугьлай бия: Рукьижат ХIасан-ХIусайнова, Камилат Оьмариева, Гулизар Абачараева.

Хъирив ЧIяйннал ккаккан бувуна «Ххувшаврил кьини» тIисса спектакль. Муниву Аьйша тIисса хъамитайпа Хъундяъвилия зана къавхьусса кIия арсная буслай бия мюрщи­сса цила кIива душнихь.
1-мур ЦIувкIуллал кружокрал ккаккан бувуна зунттаву­сса захIматкашнал бихьлахьисса захIматраясса къямадия. Мунин цIа дия «ЧIаххувранний» тIисса. Шикку цилла роль лайкьну дугьлай бия Бича Ванатиева ва цаймигу.

ЦIущаннил кружокрал кка­ккан бувуна «Авчитал» тIисса спектакль. Шикку сивсуну роллу дугьлай бия школалул дуклаки оьрчIру.
Бяст-ччаллил ахирданий жюрилул дуруна укунсса жям: 1-мур кIану буллуна Вихьуллахьхьун, 2-мур – ЧIяйннахьхьун, 3-мур – 1-мур ЦIувкIуллахьхьун.
Шадлугърал ахирданий Ккуллал райондалул Культуралул управлениялул каялувчи Марина Ибрагьимовал цинявннахь барча дуруна Театрданул кьини. Ванил мукунма кIицI бувуна Хъусращиял шяраваллил Халкьуннал театр гьуртту хьушиву Дагъусттаннал автономиялун 100 шин хъанахъисса МахIачкъалаливсса шадлугърай ва миннан ххуйсса кьимат бивщушиву.