Декабрьданул 2-нний райондалул администрациялул актовый залдануву райондалул бакIчи МахIаммадхIажи Айдиев хьунаавкьунни кIулшиву дулаврил учреждениярттал хъуниминнащал. Микку ххал бивгьунни школардайн къазаназисса оьрчIал хIакъиравусса масъалартту.
Совещаниялий гьуртту хьунни райондалул депутатътурал собраниялул председатель Мавлуттин Исламаьлиев, ФСБ-лул вакил АхIмадуллагь Аьлиев, райондалул хъунаманал хъиривми, райондалул ОМВД-лул хъунама Садруттин Рашидов, участковыйтурал хъунама Камал Делеков, балугъравун къабивсса оьрчIал иширтталсса буллалисса инспектор Марина Къапланова, полициянал зузалт, школардал директортал. Марина Къаплановал бувсунни школардайн къазаназисса оьрчIащал дуллалисса давурттая. «Виваллил иширтталсса буллалисса отделданул жагьилталгу, миннавухва дуклаки оьрчIругу терроризмалул ва экстремизмалул мусиватравух хIала буххаврия махъаллил буваву мурадрайсса давурттив дуллай буссар. БувчIин буллай буссар ми иширттачIан гъан шаврил цукунсса баларду бакIурдичIан буцлациссарив», — увкунни мунил. Гьаз бунни ЦIуссачIурттащиял шяравасса кIия дуклаки оьрчI кьатIаллил билаятирттайн дуклан лагаврил масъалагу. Хъирив директортурал бувсунни дарсирдайн къазаназисса оьрчIал тагьардания ва къазаназаврил сававрттая. ХIажи Айдиевлул школардал хъуниминная тIалав бунни дарсру кьаритлатисса гьарцагу оьрчIал ялувбацIаву дуван, багьантту буллай дарсирдайн къазаназисса оьрчIащал кьянкьасса, низамрайн уцлацисса ххуллу ласун.
