ЦIуссалакрал райондалул администрациялул бакIчи ХIажи Айдиевлул ЦIуминалийсса школардал директортуращал совещание дунни.
Совещаниялий гьуртту хьунни райондалул бакIчинал хъиривчутал Аьли Исрапилов ва Аьвдурашид Буттаев, КIулшивуртту дулаврил управлениялул хъунама Руслан МахIаммадов.
Совещаниялий ххалбивгьунни райондалул школардайн оьрчIру биян баврил ва школарду луттирдал дузал баврил масъалартту. ОьрчIру школардайн биян баврил хIакъиравусса ихтилат бунни Руслан МахIаммадовлул. Шиккува гьаз хьунни Новостройрал школардай дуклакисса Украиннавасса оьрчIру биян баврил хIакъиравусса ихтилатгу. Райондалул бакIчинал тапшур бунни КIулшивуртту дулаврил управлениялул хъунаманайн, дуклаки оьрчIру школардайн биян баврил масъала ччясса чIумул мутталий щаллу бан ва Украиннал оьрчIру буцлансса транспорт дузал дан. Мукунма райондалул бакIчинал тапшур бунни кIицI лавгсса масъаларттал хIакъираву нитти-буттащал собрание дан. Машиналул ххуллу лахълахъисса оьрчIру бала-апатIирттая мюхчан баву мурадрай, ххуллул ялтту бахьттагьалтрансса ламурду бишин маслихIат бунни райондалул бакIчинал цалчинма заместительнал.
Дуклаки оьрчIру луттирдал дузал баврил хIакъираву ихтилатру бунни школардал директортурал. Миннал бувсунни хъуними классирттавусса оьрчIал нину-ппу луттирду биялну бакъа цIуру-кIуру тIий бушиву.
Райондалул бакIчинал тIалавшинна дунни махъсса 3 шинал дянив школардай луттирду булаврил тагьар ци дуссарив кIул бан.
