Лакрал райондалул администрациялий хьунни кIулшиву дулаврил управлениялул сакин дурсса школарттал директортуращалсса совещание.
Муний ялагу гьуртту хьунни райондалул бакIчи Юсуп МахIаммадов ва администрациялул террорданийн къаршисса комиссиялул отделданул зузалт.
Цалчин ххалбигьлагьисса суал бия школарттал сайтру зузи баврия. КIулшиву дулаврил управлениялул пишакар Сабир Ибрагьимовлул бувсунни школарттал сайтру аьркинсса информациялул буцIин баврия. Ванал кIицI лавгунни КIулшиву дулаврил министерствалул хъуннасса къулагъас дуллай бушиву террорданийн къаршисса даврийн дагьайсса информациялух. Мукунма багьлай бусса бур методический информациягу цIу буллан.
Юсуп МахIаммадовлул тIалав бунни террорданийн къаршисса даврих хаснура агьамсса къулагъас дуллан. Ванал кIицI лавгунни Республикалул БакIчинал тIалавшинна душиву, школарттай террорданийн къаршисса давуртту гужлан дуллансса, экстремистурал чул бувгьуминнансса нахIу парча хъун хъанахъисса ник душиву хIисавравун лавсун.
Террорданийн къаршисса отделданул каялувчи Щамххал Сайпуллаевлул кIицI лавгуна кIулшиву дулаврил идарарттай террорданийн къаршисса давриву хьунадакьлакьисса диялдакъашивуртту. КIицI лавгуна мюхчаншиврул паспортругу цIу бан багьлай бушиву.
ЦIанакул щалва билаятрайра нигьачIисса грипп душивугу хIисавравун лавсун, ххал бивгьунни школарттай муния буруччинсса чаранну.
