Июнь зурул 10-нний Ккуллал райондалул Ваччавсса Культуралул центрданул къатраву хьунни цалчинсса райондалул депутатътурал форум. Форумрай гьуртту хъанай бия циняв шяраваллал депутатътал бакъа, Лакрал ва Ккуллал районнал цачIусса полициялул хъунама Юсуп Амиров, кIирагу райондалул прокурорнал хъиривчу Сяид МахIадов ва цаппара идарарттал бакIчитал.

Депутатътурал хьхьичI райондалий дуллалисса давурттая, хъанахъисса дахханашивурттая кутIану бувсуна Ккуллал райондалул муниципал сакиншиннарал бакIчинал Сяид Сулаймановлул.

 

 

 

 

 

 

 

— На барча буллай ура зу ва жулла цалчинсса райондалул зумунусса хьунабакьаврищал.Жува ца давуру дуллалисса. Жула кушурдаву ца пикрир муданмагу бу­сса. Му пикригу укун архну зун­ттаву яхъанахъисса жула инсантурал оьрму ххуй чулинмай бигьа бувансса хIуччардах луглагавур ва ми биттур буван хIарачат буллалавур. ХIатта жунма кIулсса ишру багьана хъанай, райондалул бюджет ссуссукьусса бунугу, райондалул администрация хIарачат буллай буссар райондалийсса инсантурал оьрму ххуй буван. Депутат — му халкьуннан аьркинмур биттур буллалисса къуллугъчири! Къуллугъчи цувагу буржлувссар, цала миллатрал кIюла кIанттурду ххал бувну ми кьянкьа-кьурчIи буван­сса иширттах луглан, — куна райондалул бакIчинал. Хъирив доклад бувна Райондалул депутатътурал собраниялул председатель Гъази Оьмаровлул.
— Майрал 31-нний МахIачкъа­лалив хьуссар цалчинсса Респуб­ликалул депутатътурал форум.Га форумрай гьуртту хьусса цаппара шяраваллал бакIчитал ва депутатътал буссар залдануву. КьюлтIсса зат бакъар жула даву хас хъанай дур жяматрал дянив экономикалул, политикалул ва социал оьрму ххуйну бачаврищал.Ккуллал райондалул депутатътурал корпус бур 92 инсанная хIасул хьуну. Ми чан­сса къахъанахъиссар 11 азара инсан яхъанахъисса райондалий.
ХIукумат дайдихьлахьиссар жува яхъанахъисса шяраваллавату.Шикку яхъанан цукунсса куклушивуртту хIасул дурну дурив, мунийнур кьимат бишлащисса райондалун, республикалун, хIукуматран. Циняв депутатътуран цала давриву агьаммурну хIисав дуван аьркинссар шяраваллил сий, ялун чIалачIимур ххуй давриха зузаву. Мунияту гъинтнил кьинирду дунува дуван багьлагьисса давурттивну хъанахъиссар шяравусса инсантурал, ятту-гъаттарал хIачIайсса щин дусса кIантту бакьин баву, шяраваллал вивсса ххуллурду бакьин баву.Ттун кIулли шяраваллал яла «цIуцIи кIану» бушиву чаннал трансформатортту. Мий бур 1965-ку шиналва бивхьусса. Ва масалалул ялув цимилгу министерстварттайн лавгссар Сяид Сулайманов. Амма мунахь учайсса махъру бур «арцу дакъар» тIисса. Хъинну оьтарасса иш бур, къатта-къушлива дуклакисса мусор ччиччинин дичлай, шяраваллал лагмасса тIабиаьт зия дуллалаву. ДукIусса шинал ахирданий райондалул бакIчинал арцу итадаркьуссар шяраваллал администрациярттайн ми мусор дичай­сса контейнертту ласун ва плошадкартту буван. Амма уттигу ми давурттив къадайдирхьусса шяраваллу дур. Зу депутатътал ялув бацIан аьркинссару вай иширттал.
Зуща бюхъайссар суал булун, муку-мукунсса давурттив дувансса арцу ча ласуви куну тIисса. Эбрат ласияра Хъювхъиял шяраваллил жяматрая гайннал бакьин бувунни бухсса ламу, ккурчIа, культурал къатри, оьрчIал багъ. Гьарца шяраваллал бакIчитурал, депутатътурал кIункIу буван аьркинссар цала шяравасса ишбажаранчитал ва махъ нани инсантал.Шиккува кIицI буван ччива ххуйну яхьуншиврул дуллан аьркиншиву налогру. ХIукумат налогирттайри дарцIусса.Мунияту депутатътурал кумаг буллан аьркинссар шяраваллал бакIчитуран налогру датIлан.
Гъази Оьмаровлул цала докладраву к1ицI бувуна мукунма цаймигу шяраваллал оьрмулуцIун бавхIусса, депутатътал гьуртту хьун багьлагьисса масаларттугу.
Форумрай ялагу ихтилатру бувуна: полициялул бакIчи Амиров Юсуплул, прокурорнал хъиривма МахIадов Сяидлул ва цайминналгу. Икьрал дуруна укунсса форумру чIун-чIумуй буваван.