Ингилиснал чичу Киплинг­лул куну бур: «КIулшиву дунияллийсса хъиншивурттаву яла лахъмурну хъанахъи­ссар, га луртамалийсса духьурча. Да­къахьурча, га аьркин дакъа­сса затран хIисавссар», — куну. «Луртамалийсса кIулшиву» тIисса калима – му чIявусса чуллу бусса ишну хъанай бур.

Жу, учительтал, ва ишираву аьдат хьуну буру чIявусса компьютерду бушиву, библиотекарттаву личIи-личIисса элмурдан хас бувсса луттирду бушиву, дуклаки оьрчIал ххуйну ЕГЭ дулаву, медаллу ласаву хIисав дуллай кIулшиврул луртамалун. Жямат­рал пикрилий тIурча – лахъсса кIулшиврун хIисав дуллай бур кIулшиву ларсма жяматрал чулинмайсса цалва пикри бусан кIулсса икIаврийну.
Буссарив дарс дишаврил методикалул давурттаву чIумул тIалавшинна биттур дувансса кьяйдалул кIанттурду?
Гьай-гьай, школалун аьркинну бур автобусру, «аькьлу бусса» доскарду, цIусса партарду. Амма хъиннува школалун аьркинну ур цIусса чIумул учитель, цIусса стандартирттал тIалавшинна биттур дуван бюхълахъисса профессионал. ЦIанасса учитель анжагъ ца предметрал дарс дишайсса учитель акъа, икIан аьркинну ур гуманитариялул учительгу, психологгу, менеджергу, дарс дишаврил цIусса методикартту хIасул дувугу…
Вихьуллал дянивмур даражалул школалул учительтурал дарс дишаврил методикалун хас дурсса темарду ххал дигьлагьийни, жу жулла давриву гьарта-гьарзасса масъаларттайну гайннучIан бучIанмур бувару. «Ккуркки столлу» хIадур бувару, гьарца учительнал цалвамур пикри бусан хьуншиврул. Учиннуча, байбихьулул кла­ссирттаву дарс дихьлахьийни, хIисавравун ласун аьркинну бур, оьрчIал дарсирайн увкIнийсса дакIнил тагьарданияту байбивхьуну, ганал макьулун диагноз дишин кIулну дикIавугума. Методикалун хас дурсса совещаниялий ихтилат бувару, уттизаманнул дарс дишаврил технологияртту ишла дурну, цукун биттур дуван бюхъантIиссарив кIулшиву дулаврил федерал стандартру. Школалул завучнал компьютердануву дуссар хIасул дурну учительнал дуллалимунил таксса картарду, цилгу учительнаясса укуннасса информация датIлатIисса файллу бакъача, ганал дарс дишаврил пагьму хIисавравун ласласисса, цукунсса методикалул иширттавух гьуртту хьуссарив, цукунсса темардан хас бувсса курсру къуртал бувссарив, га учитель дарс дихьлай ивкIсса оьрчIал цукун­сса аттестация хьуссарив, класс­раву дарс дихьлахьийни акъагу, гания махъгу оьрчIал чулинай цукун къуццу тIий ивкIссарив бусласисса информация. Му карталух цува учитель урувгсса чIумал, ганан чIалан бикIайссар цува цумур чулий хьхьарану зий уссарив, ци лях ларгун дуссарив. Вай затру хIисавравун лавсун, яла ганаща хъанахъиссар цала профессионалсса кIулшиву гьарта-гьарза дуллан.
На, Москавлив цайми школардал директортуращал стажировкалийн лавгун увкIния махъ, хIасул дурссар школалий цIусса дуклаки оьрчIал кIулшиву лахъ дуван бюхълахъисса технологиярттацIун дархIусса программарду.
Жул 3 учительнал, шяравугу бунува, компьютерданул кумаг­райну, дистанцион режимрай къуртал бувссар предметирттал курсру, МахIачкъалаливсса учительтурал кIулшиву лахъ дайсса институтрал программалий.
Школалий дарс дихьлахьи­сса учительнал касму дугьаврил мяъна ци дуссарив цанна кIулсса чIумал, дихьлахьисса дарсирал диялдакъашиву духлаган дуван ци диял къахъанахъиссарив цанма кIулсса чIумал, му хъанай ур цала классравусса дуклаки оьрчIан бунияласса кIулшиву дулун хIарачат буллалиману. Шикку хьунабакьлан бикIай ца хъунмасса «Амма». Масалдаран, учитель хIакинначIан увкIсса чIумал, циняв инсантурал кунма, буслай ур цалла ци цIуцIиссарив ва ци багьана хъанахъиссарив га цIуцIаврин. Амма учитель завучначIан увкIсса чIумал, га мукIру хъанай акъар цащара дарс дихьлахьийни кIанин бутан къахъанахъисса иширттал хIакъираву. Шиккува ванахь цIуххирча: «Цама учительнал дишайсса дарсирдаву винна ци диялдакъашиву чIалай дур?» — куну, га рязину буслай ур. Вана учительнал «гъайучин багьлагьисса хъу».
Методикалул давурттив школалий гьарта-гьарза дуваншиврул, учиннуча, цукунчIавсса ххишаласса арцу аьркинсса иш бакъар. Мунияту, методикалул цIусса журарду дарс дишайни ишла булларчарив, школалул оьрчIан кIулшиву дулаврил шачIану лахъ хъанай бур.
Аьлил МахIаммадов,
Вихьуллал школалул
директор