Нава цIана ихтилат буллалисса оьрчIруксса усса чIумал, ттун баяйва: «ЧIиви оьрчI Кьурандалул луттираха лавхьхьуссар», — тIисса калима. На пикри буллан икIайссияв: «Луттираха лавхьхьусса цукуннивав оьрчI?» тIий. Яла, угьара хьуну махъ, бувчIлан бивкIуна, Кьурандалул луттираву цичIав жагъаласса бакъахьувкун, гукуна марцIсса икIайшиву чIиви оьрчIгу. Гьай-гьай, оьрчIан мяърипат дулаву, хъунанал хIурмат буван лахьхьин баву нитти-буттал ва школалул биялдарасса зат бур.
ХIажимурад ХIусайнов
Уттигъанну на, Ваччату шавайн ахьтта най, Хъюйннал шяраваллил клубрал къатрал хьхьичIун ивсса чIумал, клубрава бувккун ца душнил ва шама оьрчIал, ттул лагма рургьуну: «Ахьтта манарда шавайн, жу вин машина бацIан буванну», — куну, бунияла га лахIзалуву Ваччату ттул шяраваллил чулинмай нанисса машина, мукьагу дяххуллий уттайнмай бавцIуну, бацIан бувуна. На муксса рязий хьунавхха, ци тIунссарив, ци дулланссарив къакIулну, «барчаллагь, барчаллагь» тIий, гьанавиххину ливчIунав.
На яла вай дакIру гьартасса оьрчIал сурат рирщуссия. Махъгу буллуссия «Илчи» кказитрай рищунна куну. (Гайннан на цу уссарав ганиннина кIулну ияв). Киях бавцIусса душнийн Фарида учайсса кIулссия. Гайминнал цIарду ттун къакIула. Укунсса дакIру дусса ник ялун нанисса чIумал, Лакку билаят ябувансса инсантал ялун най бушиву тасттикь хьуна.
