«Илчи» кказит бур ца яла бюхттулмур, марцIмур, гъилимур миллатрал ккурчIа – лакку мазрал марцIшиву, пасихIшиву, ххаллилшиву ва куртIшиву дуручлачисса бакIщаращи, мунихсса мякь ялу-ялун гуж хъанай бур Лакку билаятгу, ниттил мазгу, миллатрал бюхттулсса тарихгу ххираминначIа, мугу хъанай бур ва 25 шинай кIанттуву оьрчIах кунна ттюнгъа аякьа дуллай ялув бавцIусса жунма хъинну ххирасса ххаллилсса кказитрал зузалтрал гьунар.
Хъунмасса барчаллагь тIий ура цалла даву исвагьину, щихачIав къалархьхьуну дуллалисса, лакку мазгу, мунил аьламатшивугу, эмаратшивугу дуручлачисса, ххаллилсса «Илчи» кказитрал заргалтурахь-корреспондентътурахь, хаснува 25 шинай щалагу Ухссавнил Ккавкказнаву ца цуппалусса республикалул кказитрал редакторшиву дуллалисса хъамитайпа – миллатрачIа хъунмасса хIурматрайсса, жунма ххирасса, вай дурчIин къашайсса шиннардий багьа бищун къабюхъайсса даву дуллалисса ХIусайнахъал Абачарал душнихь Качардухь. ЧIярусса захIматшивурттугу, кьурчIишивурттугу дуркIунни вичIан, амма кказитрахсса ччавугу, мунил даражагу, лакку мазрал марцIшивугу бюхттул дурунни ина. Барчаллагь!
Бюхттулсса Совет Союзрал чичу Чингиз Айтматовлул увкуну бурхха: «Цумур-цагу миллатран ччай бур ккашигу бакъа оьрмулухун яхъанан, оьрмулухун яшаву дур, анжагъ, ца миллатрал мазраву» — муниха зий бур жула «Илчи».
Бюхълай личIаннав!
ЦIуллушиву, тIайлабацIу чIа тIий мудангу
зуйн икрамрайсса
Шалласу Шалласуев
