Январь зурул 21-нний Гъумучиял лицейраву хьунни Дагъус­ттан Республика сакин дурну 95 шин там шаврил юбилейран хас дурсса линейка. Муний гьуртту хьунни лицейрал директор МахIаммад Хъунбуттаев, райондалул кIулшиву дулаврил управлениялул хъунаманал хъиривчу Соня Мухуева, райондалул администрациялул оьрчIащалсса ва жагьилтуращалсса даврил отделданул каялувчи МахIаммад Гадаев,
балугъравун къабивминнал ишир­тталсса ва миннал ихтиярду дуруччаврилсса буллалисса комиссиялул секретарь Айманат Нурдуева, лицейрал учительтал.

МахIаммад Хъунбуттаевлул бувсуна РСФСР-данувун духлахисса Дагъусттан Республикалул автономия баян бансса ВЦИК-рал декрет кьамул бувшиву 1921 шинал январь зурул 20-нний. Муния баян бувну бур ноябрь зуруйва Темирхан-Щурагьун Дагъусттаннал халкьуннал анаварсса съездрайн паччахIлугърал бакIчи, Лениннул тIайла увксса миллатирттал иширтталсса буллалисса нарком Иосиф Сталиннул. Муниннин диркIссар Дагъусттаннал область, хъуншагьру – Темирхан-Шура.
Ва кьинилия шихунмай Да­гъус­ттаннан буллуну бур паччахIлугърал статус. Вара шинал декабрь зуруй щалвагу Дагъусттаннал халкьуннал советирттал учредительный съезд­рай кьамул бувну бур ДАССР-данул Конституция. Ва агьам­сса иширая мукьах кьадагьну дур Ккавкказнавусса тарихрал ва политикалул къаршибацIавуртту. Дагъусттан Аьрасатная батIул къахьунтIишиву баян бувну бур.
МахIаммад Хъунбуттаевлул ялагу кIицI лавгуна чIяву миллатру бусса зунттал халкьуннан даин асар хъанай бивкIшиву цивппа дунияллул культуралул ирсиращал кIул бавриву оьрус­нал интеллигенциялул чулухасса кумаг. Оьруснал пишакартурал чялишсса гьур­ттушиндарайну Дагъусттаннай хьхьичIуннай хьушиву кIулшиву дулаву, элму, цIуллу-сагъшиву дуруччаву, литература ва магьирлугъ. Буллай байбивхьушиву цIу-цIусса предприятияртту, заводру, хьхьичIуннай хьушиву транспорт ва связь.
Цилва ихтилатраву Соня Мухуевал чIурчIав дуруна ялун нанисса ник ватан ххирану тарбия даврих. «Билаятрал бучIантIимур зул кIунттихьри бусса. Ппухълуннал аьпалун лайкьсса ирсну буккан хIарачат бувара», — увкуна ванил.
Ихтилатру бувуна МахIаммад Гадаевлул ва Айманат Нурдуевал.