Махъсса шиннардий ниттил мазурдий чичлачисса шаэртурал шеърирду оьрус мазрайн таржума буллайвагу бакъая. Цивппа чичулт хъирив бувккун, хIарачат буварча бакъа, совет заманнай куннасса, миллатрал чичултрал произведенияртту оьрус мазрайн таржума буллан аьркинссар тIисса даву чIалай дакъая, я муниха зун гъирами бакъая.
Му кIану хIисавравун лавсун, цаппара дагъусттаннал шаэртурал шеърирду цила зумуну усттарну таржума бувна щалвагу Аьрасатнаву машгьурсса шаэр, публицист, литературалул критик Миясат Муслимовал.

ПатIимат Рамазанова
Вана утти вай гьантрай, гьа­манки, Миясат Щайховнал хIа­рачатрайну Дагъусттаннайн увкIунни машгьурсса шаэр, таржумачи ва издатель Максим Амелин. Му хьунаавкьунни Дагъусттаннал университетрал филологиялул факультетрал студентътуращал, МахIачкъалалив ва Дарбантлив – миллатирттал мазурдий чичлачиминнащал ва литературалуха зузиминнащал.
Декабрьданул 3-нний Расул ХIамзатовлул цIанийсса Миллатрал библиотекалуву хьунни ниттил мазурдийсса дагъусттаннал ттизаманнул литература таржума дуваврил ва хьхьичIуннай дуваврил масъалартту ххал бигьлагьисса ккуркки стол. Му агьамсса даврил дайдихьу дуллалисса ихтилатраву Миясат Щайховнал кIицI лавгунни Аьрасатнал Президент Владимир Путиннул регионнай ниттил мазурдий чичлачисса итххявхсса чичулт бушиврий ва миннал произведенияртту оьрус мазрайн таржума буллан багьлай бушиврий чIурчIаву дуршиву ва, мунал тапшур бувну, Печатьрал ва массовый коммуникациярттал Федерал агентство Аьрасатнал халкьуннал миллатрал литература гьаз дувансса программа бартдигьавриха зий душиву. Бувсуна, гьаманки, му мурадрай, дагъусттаннал чичултращал хьунаакьин увкIшиву Москавлиясса бусрасса хъамаличу Максим Амелингу. Бувсуна Аьрасатнал халкьуннал литературалул хъунмасса антология итабакьин хIадур буллай бушивугу.
Максим Амелиннул цалвамур ихтилатраву бувсунни 14 мазрай чичлачисса республикалул шаэртурал антология кьиматрай бикIантIишиву, шеърирду ниттил мазурдий ва оьрус мазрай (таржумартту бикIу, подстрочникру бикIу) бищун дакIний бушиву ва прозалул ва оьрчIансса антологиярттугу итабакьинсса ният душиву. «Регионнай миллатирттал чичултрал луттирду итабакьлай бухьурчагу, ми хъуншагьрулийн буклай ба­къар. Жу пикри буварду миллатир­ттал шаэртурал произведенияртту цачIун батIин. Гьай-гьай, циняв шаэртурал шеърирду къагьанссар антологиялувун, къаччан бивкIссагу букканссар. Жул хъунмур мурад, щалвагу Аьрасатнан, хаснува чиновниктуран, миллатирттал мазурдийсса литература уттарану душиву ккаккан бувавур», — увкунни Максим Амелиннул.
ДНЦ РАН-далул Мазрал ва литературалул отделданий каялувшиву дуллалисса Малик ХIусайновлулгу кIицI лавгунни миллатирттал мазурдий чичлачими бушиву, амма миннавасса чIявуми луттирду цалва харж буккан бувну итабакьлай бушиву, луттирду итабакьай идарартталгу гьунар буми автортурах къулагъас дакъашиву. Бувсунни дакъашиву критикагу. Миясат Муслимовал, му кIанугу хIисавравун лавсун, маслихIат бунни кIицI лавгсса отделданун, цуми автортурал луттирду итабакьин багьлай буссарив ххал бувну, луттирду итабакьай идарарттайн рекомендация дулаван. Миллатирттал шаэртурал бувккунни цалва мазурдийсса шеърирдугу. Лакралми шаэртурава шеърирду бувккунни Миясат Щурпаевал ва Алексей ХIажиевлул. «Ккуркки столданул» хIакъиравусса цалвамур пикри буслай, Алексей ХIажиевлул увкунни: «На къарязира миллатрал литература къаитакьлай дур, Да­гъусттаннай дурагу ца издательство му давриха зий дур тIутIиминнай. Ччиссаксса луттирду итабакьай идарартту ва басмаханарду бур. Дакъар цурда литература. Дакъар критика. Бакъар таржумарттал школа. Хьхьарасса шеърирду итабакьлай бур. Цаппара чичулт бюхъавай чIявусса луттирду итабакьин хIарачатрай бур. Агьамсса масъаларттуми чIявусса бур, миннуха зун аьркинмигу бур».
Оьруснал таржумачитурал ва дагъусттаннал чичултрал дусшиврул гьану бивзссар, хъиндайдихьу дурссар. Давумур хьхьичIри ду­сса. Укун ххуйсса даврил сиптачи хьусса Миясат Муслимовайн барчаллагьрай бур дагъусттаннал чIявусса чичулт. «Фейсбукраву» ва цаймигу социал сетирдай мунил даврин лавайсса кьимат бишлай бур. Биялсса хIарачат бугу-бунни Миясат Щайховнал, Москавлиясса чичулт узданну хьунагу бавкьуну, Дагъусттаннал агьалиная рязину личIансса куццуй тIайлагу буккан. Мукунми иширттавугур Дагъусттангу, дагъусттаннал агьалинал хасиятругу аьч хъанахъисса. Ца мукъуйну ххи баннив, сий дуллалисса.