Ноябрь зурул 26-нний Ккуллал райондалийн увкIун ия Дагъусттаннал цIуллу-сагъшиву дуруччаврил министр Танка Ибрагьимов. Ванащал бия мукунма Аьрасатнал Госдумалул депутат Аьвдулмажид МахIрамов ва Дагъусттаннал Роспотребнадзорданул хъунмур Элеонора Оьмариева.
Цалчин вайннал райондалул администрациялул къатраву кьамул бувуна суаллащал бувкIсса цаппара инсантал. Яла вай хьунабавкьуна райондалул азарханалул зузалтращал. Шикку хьуна Ккуллал райондалул инсантурал цIуллушиву дуруччаврин хас бувсса личIи-личIисса масъалартту ххал бигьлагьисса ихтилатру. Дуллуна жавабру буллусса суаллахьхьун. Лавгуна палатарттавух буккангу.
Ахирданий вайннал Ккуллал райондалул азарханалун буллуна цIусса аьркиншивурттал дузал бувсса анаварсса медициналул кумаграл машина.
