Августрал 1-нний Хъунзахъиял райондалий хьунни Дагъусттаннал цалчинма президент МухIу Аьлиевлун 75 шин шаврин хас дурсса шадлугъ. Аьрасатнал халкьуннал аьдатсса культуралул центрданий райондалул жяматрал цIанияту МухIу Аьлиев барча уллалисса ихтилат бунни райондалул хъунама Сяид Юсуповлул.
Мунал бувсунни райондалул агьалинал хъунмасса пахру бушиву цалла райондалия мукун гьунар бусса политик, каялувшинначи, паччахIлугърал зузала уккаврияту, му Тануси тIисса шяравасса ушиву. Дагъусттаннал БакIчинал, ХIукуматрал ва Халкьуннал Мажлисрал цIанияту юбиляр барча унни цалчинма вице-премьер Анатолий Карибовлул. «Дагъусттаннай каялувшиву дуллалисса ппурттуву МухIу Аьлиевлул республика гьаз дувансса хIарачат бувссар, мунал дурсса даврил хIурмат хъунмассар жучIава. Цинярда давурттив кIицI къалагланну, 50 школа бувссар кутIасса чIумул мутталий, здравоохранениялул 75 объект, Кардиологиялул центр, Мурад Къажлаевлул цIанийсса школа, Аьли Аьлиевлул цIанийсса Спортрал чIалъаь, зунттал районнайн газ буцлай байбивхьуссар, 24 шяравалу щинал дузал дурссар. Республикалул Халкьуннал Мажлисрай каялувшиву дуллалинийгу мунал хъуннасса даву дурссар республикалул агьалинал оьрму гьарца чулуха сантирай ва лябукку буну хьхьичIунмай хъит учин буван», — увкунни вице-премьернал.
Республикалул БакIчинал цIанияту МухIу Аьлиевлун дуллунни «Буттал аьрщарахсса ччаврихлу» тIисса орден. Дагъусттаннал БакIчинал ва ХIукуматрал Администрациялул хъунаманал хъиривчу Алексей ХIасановлул кIицI лавгунни хIакьину МухIу Гьимбатович кунмасса государственниктал чансса бушиву Аьрасатнаву, му цува каялувшиву дуллалисса даврий гьарманая ххуйну зузаву тIалав дувайсса, ва даву низамрайн рутайсса хъунама ушиву. Юбиляр барча унни Социалист ЗахIматрал Виричу МахIаммад МахIуловлул, ЗахIматрал ва социал развитиялул министр Малик Багълиевлул, Финансирдал министр Аьли Исламовлул, Ухссавнил Ккавкказуллал иширтталсса буллалисса министрнал маслихIатчи Ризван ГъазимахIаммадовлул, ДГУ-рал ректор Муртазааьли Рабадановлул ва цаймигу къуллугъчитурал. КIиккура хьунни МухIу Аьлиевлун хас дурсса волейболданул турниргу. МухIу Аьлиевлул барчаллагь увкунни цува лахъа-хъун уван бавтIцириннахь. Бувсунни цува мудангу хIадурну ушиву дагъусттаннал агьалинал оьрму ххуй бавриха зун.
