Январь зурул 30-нний Ккуллал райондалийн увкIун ия Дагъусттаннал ххуллурдал агентствалул каялувчи Хучбаров Загьид.
Ва кьини ванал кьамул бувна ххуллурдал ялувсса суаллащал бувкIсса жяматрал вакилтал. Суаллахьхьун жавабру дуллай, ванал бувсуна,
Дагъусттаннал БакIчинал хIукмулийн бувну, Дагъусттаннал циняв районнал хъун шяраваллавун бияннин асфальт бакьин хIукму бувну бушиву. Мунийн бувну, ЧIяту байбивхьуну, Щардал шяравун бияннинсса ххуллу бакьин буллай, асфальт бутIиннинсса хIадуршинна дуллай бушиву, 2016-ку шинал вай давурттан итадаркьуну душиву 30 миллион арцул. Амма Аьрасатнал хIукуматрал экономика ссуссукьу шаврийн бувну, Ккуллал райондалий, цалчинмур квартал къуртал къархьуну, цайми ххуллурдал давуртту дулланну учин къахьунтIий бушиву бувсуна. ШавкIуллал лулттусса неххайхсса ламу шяраваллияр цахъис кIихунмайну бувантIишивугу бувсуна. Проект дуллай, дузал шавай дуссар тIива.
Гьаз хьуна суаллу мукунма, СумбатIуллал шяравату арх бакъасса, Ккулув ва Хъусрахьхьун нанисса ххуллийсса ва Хъуннеххайсса Хъюйннал ламурду бакьин буван багьлагьишивриягу. Экономикалул ишру цахъис бухьурчагу ххуй хъанан бикIайхту, кIицI бувсса ламурду бакьин бувантIишивугу бувсуна. Щарату 2-мур ЦIувкIуллал шяравун нанисса ххуллу ххал бувангу гьан буваншиву бувсуна комиссия. Жавабру дуллуна цаймигу суаллахьхьун.
