Вай гьантрай Москавлив ва МоскавуллачIан гъансса шагьрурдай хьунни «Мастера искусств России – участникам СВО» тIисса цIанилусса Щалагу Аьрасатнал ихIсандалул акция.

Имара Саидова
Шикку гьуртту хьунни музыкалул, художествалул ва поэзиялул усттартал ва творчествалул интеллигенция.
Жула республикалул чулуха ва мероприятиялий гьуртту хьунни Дагъусттан Республикалул Музыкантътурал союзрал правлениялул председатель, Аьрасатнал искусствалул лайкь хьусса ишккакку, профессор, пианист Хан Баширов.

Хан Мирзахановичлул хIадур дурсса творчествалул программа дия Расул ХIамзатовлул 100 шин ва Дагъусттаннал Музыкантътурал союзран 65 шин шаврил юбилейрттан хас дурсса.
Шиккува кIицI лаган, Республикалул кьатIувсса ихIсандалул мероприятиярттай Хан Мирзаханович уттинингу цимилгу гьуртту хьуссар ва лайкьсса даражалий ккаккан дурссар Дагъусттаннал музыкалул искусство.

Ва ххуллухьсса мероприятиялийгу Хан Башировлул бувсунни Дагъусттаннал миллатирттал культуралия, искусствалул мастертурая, щаллу бунни цаппара произведенияртту, пишкаш бунни луттирду, нотарду, цува гьуртту хьусса кинордал дискру, бувккунни оьрчIан чивчусса цалва хаварду ва жавабру дуллунни буллусса суаллахьхьун.

Хан Мирзахановичлул цала ихтилатраву кIицI лавгунни Дагъусттан мудангу бушиву ва бикIантIишиву хъунмасса авкьат бусса Аьрасатнал билаятраву.