Юбилейрал шадлугърай гьуртту хьунни ДР-лул ХIукуматрал хъунаманал цалчинма хъиривчу Анатолий Карибов, республикалул печатьрал ва информациялул министр Бурлият Токболатова, Дагъусттаннал Журналистурал союзрал хъунама Аьли Камалов, Чичултрал союзрал хъунама МахIаммад АхIмадов, луттирду итабакьай идаралул ветерантал ва цаймигу.

Зулайхат Тахакьаева
Шадлугъ дайдирхьуна издательствалул тарихрая бусласи_сса «Дом, в котором рождается книга» тIисса документал сурат ккаккан даврийну. Муниву бувсун бия издательствалул ххуллу тIивтIушиврия гихуннай цал цIарду машгьур хьусса шаэртуран ва чичултран: Расул ХIамзатовлун, Фазу Аьлиеван, АхIмадхан Абу-Бакардун, Рашид Рашидовлун, Юсуп Хаппалаевлун, Анвар Аджиевлун, Шах-Эмир Мурадовлун, Кад­рия Темирбулатован, МутIалиб Митаровлун, Хизгил Авшалумовлун ва чIявусса цаймигу Да­гъусттаннал чичултран.
Луттирду итабакьай идаралул директор Марина Оьмаровал лу сакин баву лащан бувна оьрчI бавриха. Амма лу дунияллийн буккаву – му хъунма­сса захIмат аьркинсса, щаллусса коллектив (автортал, редактортал, корректортал, технический персонал, художниктал, верстальщиктал) гьуртту бакъа дузрайн къаду­ккайсса давур, увкуна. ЧIивисса харжирах хъунна­сса ва мюнпатсса даву дуллали­сса инсантурахь барчаллагь тIий, хаснува кIицI лавгуна дагъусттаннал литература хьхьичIуннай давриву хIакьинусса кьинигу багьа бакъасса захIмат бихьлахьи­сса издательствалул даврил ветерантурахь. Марина Оьмаровал чIурчIав дуруна 1925 шинал октябрь зуруй сакин був­сса луттирду итабакьай идаралущал гьашинусса шин юбилейрал шинну хъанай душиву щаллагу республикалул паччахIлугърал луттирду итабакьаврил даврингу. 1921 шинал совнаркомрай сакин дурну дур хасъсса печатьрал отдел.
Идаралул зузалт байрандалущал барча буллай, Анатолий Карибовлул кIицI лавгуна дахьра сакин хъанахъисса шиннардий издательствалул даврих хъуннасса къулагъас дуллай бивкIшиву. Идаралий бихьлай бивкIун бур издательствалул планну ва программарду ххалдигьаврил, художествалул, политикалул ва элмулул литература итадакьаврил бигарду. Му мурадрай идаралуцIун цIакь бувну бивкIун бур кIива типография — МахIачкъалаливсса ва Буйнакскалийсса, мукунма цайми шагьрурдайсса складругу.
«Луттирду итабакьай идара хаснува тIалавну бивкIссар ларгсса ттуршукулул дайдихьулий. Республикалий сакин дурну диркIссар цIакьсса идеологическийсса, культурно-просветительскийсса ва учебно-образовательныйсса организация. Гихуннайрив издательствалул даву гьа хъанай къадиркIссар так луттирду итабакьаврийну, идара хьуссар республикалул культуралул, кIулшивурттал, литературалул ва магьирлугърал кюруну», — увкуна ванал.
Цалва ихтилат Анатолий Ка­рибовлул къуртал бувна Рес­публикалул БакIчи Рамазан АьбдуллатIиповлул мукъурттийну: «Литература дакъахьурча, дакъассар цивилизация». Щак бакъа, лу бакъахьурча, царагу агьамсса хьхьичIуннайшиву миллатрал хъусну къахьунтIиссар».
Гихуннай Карибовлул дур­ккуна Рамазан АьбдуллатIи­повлул цIаниясса барча баву. Дагъусттаннал культура хьхьи­чIун­най давриву бувсса захIмат­рахлу издательствалул даврил ветерантуран дуллуна Респуб­ликалул БакIчинал цIа чирчусса ссятру. Цаппарасса зузалтран дуллуна Републикалул культуралул лайкь хьусса зузалал цIарду.
«Лу ттинингу хьуссар кIул­шивурттал щаращину ва вания тихунмайгу личIантIиссар. Жула луттирдал фондру авадан бавриха зузиминнал захIматран багьа бакъассар», — увкуна Бурлият Токболатовал, издательствалул зузалт барча буллай. Министерствалул чулухасса ХIурматрал грамотартту дуллуна цаппарасса зузалтран ва ветерантуран.