Билаятрайгу, республикалийгу лавайсса дуккаврил идарартту шиная шинайн чIяву хъанарчагу, зунсса кIанттурдуми биял хъанай бакъар. Агьалинал давурттал щаллушиннарах бурувгун хIисав дай региондалул ва щалва билаятрал экономикалул тагьаргу.

Зулайхат Тахакьаева
Аьрасат бур 83 федерал субъект цивун бухлахисса хъунмасса билаят. Гьарцагу региондалул бур цилва тарих, цилла ХIукумат, цалла сурсатру, агьали ва экономика. Мунийн бувну, давудакъашиврул тагьаргу гьарца региондалий дур личIи-личIисса. 2015 шинал май зуруйннинсса хIасиллайн бувну, Аьрасатнаву усса ур 4 млн. ва 400 азара инсан даву дакъа ливчIсса (2014 шинал январь зуруйннин му аьдад диркIун дур 4 млн. ва 180 азара инсан). Агьали давурттал щаллу байсса идарарттал сияхIрайн лавсъсса бусса бур 1 млн. инсантурал.
Билаятрайсса кризис сававну, 2014 шинал ахирданийннин 2015 шинал дайдихьулийннин Аьрасатнаву чан бувну бур 27 % зузисса инсантурал. Ххи хьуну дур даву дакъаминнал аьдад Дагъусттаннайгу – май зурул ахирданийннинсса хIасиллайн бувну, жулла республикалий усса ур 27 900 инсан даву дакъа ливчIсса (ларгсса шинал январь зуруйннин ва аьдад диркIун дур 27 азара инсан). Миннава 54 % бусса бур хъаннил. Даву дакъаминнал дянивсса оьрму бусса бур 29 шин, миннавагу гьарца шамилчинма усса ур 25 шинал оьрмулувусса. Даву дакъаминнава 22 % бусса бур дянивсса ва ларайсса кIулшиву ларсъсса.
Щалва билаятрай кунма, Дагъусттаннайгу даву дакъаминнал аьдад ххи хьуну дур цивппа заллусса идарартту лакьаврийну ва паччахIлугърал идарарттай штатру чан баврийну.
Лакрал райондалий агьали давурттал щаллу байсса центр тIивтIуния шихунмай мунил хъунмурну зузисса Аьйшати Мусалаевал бусласимунийн бувну, кризисрайн къаршину захIматрал рынокрал чIурушин лагь даврин хасну ДР-лул ХIукуматрал цIакь дурсса программа зузи дуллай вайннал идаралул дурну дур тамансса давуртту. «Содействие занятости населения» тIисса паччахIлугърал программалул лагрулуву ва шинал ларгмур дачIишинаву Лакрал райондалул ЦЗН кIийлва гьуртту хьуну бур Аьрасатнал регионнал дянивсса вакансиярттал ярмаркардай. Ми ярмаркардай видеоскайправу собеседованиярттай гьуртту хьуну бур центрданул сияхIрайсса цаппара инсантал. Март зуруй хьусса ярмаркалий Москавлив «ФерЭльГам» ООО-лий ва Ханты-Мансийскалий давуртту ляркъуну, зун лавгун ур 5 инсан. Июнь зуруй хьусса ярмаркалийгу 5 инсан даврил дузал увну ур.
Лакрал райондалул ЦЗН гьуртту хьуну бур дуклаки оьр­чIал пиша язи бугьан кабакьу буллалисса щалвагу Аьрасатнал видеороликирдал конкурсрайгу. Дайсса дур дуклаки оьрчIал профориентациялул декадар­тту, микку школа къуртал буллалиминнал дуцIин дайсса дур анкетарду.
Ларгсса шинал ва гьашинусса дачIишинал дянив центрданул давурттал дузал увну ур 195 инсан. Миннава цалва аьрзи буллусса давурттай зий усса ур 34 инсан.
Зузи кIанттурду чансса бушиврийн бувну, агьали давур­ттал щаллу байсса центрданул ляхълай бур даву дакъа ливчIми чIумуйнусса давурттал щаллу бансса чаранну. Ми дур жяматийсса давуртту. Гьарца шинал 200-нния ливчусса инсантал гьуртту шайсса бур цивппа ялапар хъанахъисса шяраваллаву ххуллурду бакьин буллали­сса, щинаххуллурду буллалисса, марцIшиврул ялув бавцIусса ва цаймигу давурттаву. Вай давур­ттаву гьашинусса дачIи шинал дянив гьуртту хьуну ур 74 инсан.
Ххувшаврил 70 шинал юбилейрал хьунийн Хъун дяъвилия зана къавхьуминнансса гьайкаллу дакьин давриву гьуртту хьуну ур 24 инсан.
Махъсса шиннардий Лакрал райондалий зун бувкIун бур 430-нния ливчусса цивппа заллусса КФХ-рду, ЛПХ-рду, СПК-рду, ишбажаранчитал. Мунинсса хъунмасса кумагну, ванил бусласимунийн бувну, хьуну бур 2009-2014 шиннардий ишбажаранчишиву тIитIин ччиминнан паччахIлугърал арцуйнусса кумаг буллалаву. Агьали давурттал щаллу баврил центрданул 145 инсаннан буллуну бур цалархIал итабакьайсса, зана бан къабагьайсса субсидиярду – 58 азарда къуруш цаннан хIисавну.
Му бакъассагу, Аьйшати Мусалаевал «Фейсбукраву» цила лажиндарай ччя-ччяни цIудуллай бур Аьрасатнал цайми регионнай (Архангельский, Томский, Пензенский, Нежегородский, Костромской областирдай, Красноярский, Приморский крайрдай, Ханты-Мансийскаллал областьрай) яхьунсса кIанттурдалгу дузал буллалисса зунсса кIанттурду бушивриясса баян бавуртту. Декретный отпускрайсса хъаннин­сса информация ва чIиви-хъунсса пиша лахьхьин ччиминнансса баян бавуртту. Миннуйнугу даву дакъаминнан даву лякъинсса кумаг хъанай бур.