ЦIуссалакрал 1-мур школалий ларгунни буттал улча лахьхьаврил XVIII-мур республикалул олимпиадалул муниципал этап.
«История, культура, образование и быт жителей моего села» цIанилусса ва олимпиадалул мурад бия итххявхсса, творчествалул гьунар бусса,
краеведениялул ахттаршиннарду дуллалисса, цала пикри бусан кIулсса оьрчIру ялун личин баву ва миннал чIарав бацIаву. Мероприятиялул сакиншинначитал хьунни КIулшивуртту дулаврил управление, Пионертурал ва дуклаки оьрчIал къатта. Олимпиадалул муниципал этапрал 3 тур дия. Цалчинмур — отборочный. ОьрчIан шаппа чичин багьлай бия ккаккан дурсса темалийсса краеведениялул ахттаршиннардаясса док_лад. Мунин яла лахъмур кьимат 25 балл буллай бия.
КIилчинмур турданий оьрчIан творчествалул (ахттаршиннарал) даву дуруччин багьлай бия. Мунихлу яла лаваймур кьимат 30 балл бия. Шамилчинмур турданий буттал улклул тарихраясса, культуралиясса, тIабиаьтраясса 20 суал бусса краеведениялул викторина хьунни. Шикку яла лаваймур кьимат 10 баллданийсса бия. Олимпиадалул хIасиллу дан бувчIусса жюрилуву бия КIулшивуртту дулаврил управлениялул методист А. МахIаммадов, жагьилтурал политикалул председатель З. МахIаммадов, тарихрал учитель С. ХIамидов, Пионертурал ва дуклаки оьрчIал къатлул директор П. Гаппаева.
Олимпиадалий гьуртту хъанахъисса оьрчIаясса тIалавшиннарду чIярусса дия.
Олимпиадалул хIасиллу дунни оьрчIру оьрмулул шиннах бурувгун кIива бутIуйх бавчIуну. Ца категориялувун бухлай бия 7-9-ми классирттал дуклаки оьрчIру, кIилчинмур категориялуву бия 10-11-ми классру.
Олимпиадалий гьурттушинна дурсса цинявппагу оьрчIал ххуйсса кIулшивуртту ккаккан дунни.
ХIадур бувссар
А. Аьбдуллаевал
