Цалнияр-цал жулва зунттаву яхъанахъисса хъузалтран бувчIлан бивкIунни, социал зумунусса иширтталсса булларча бакъа, ХIукуматрал аьрщараха, ятту-гъаттараха зузисса инсантуран вари чинсса кумаг къабуллалишиву.
Цукун-бухьурчагу, жулва инсантал ччимур ччанавккусса иширава ххуллу лявкъуну, буккайшиву жунма кIулли. Ккуллал райондалий, Аьрасатнал цIусса Граждан кодекс бувкния махъ, хIасул дуллан бивкIунни КФХ-рду (Крестьянско-фермерское хозяйство). ЧIалан бивкIунни зунттаву яхъанахъисса инсантуран колхозирттаяр махъ гайннун кIанай хIасул дурсса СПК-рдал цалла «лякьа дуччин» къадуваншиву. Циван учирча, гай кIура дарну дур къажяматрал идарарттайнча, ца-кIия инсаннал идарарттайн. Шиккува чIалан бивкIунни, ятту-гъаттарая дучIаймур хьуннав, хъурунная ласаймур хьуннав, КФХ-раща машлуй дуккан дуван къахъанахъисса ишгу, дахлахимигу хъинну кьюркьуну дакъа къадахханан хъанахъишиву. Шагьрурдайсса базардачIангу вайннаща ххуллурду ласун къахъанахъир.
Мунияту Ккуллал райондалийсса ЧIяйннал шяравасса мукьа КФХ-лул бакIчинал – МахIаммадова Саидал, Кьубатаев МахIаммадхIажинал, Шамхалова Написатлул, Аьлилова ПатIиматлул цачIун хьуну, дунни «Ассоциация крестьянско-фермерского хозяйства» тIисса сакиншинна. Ва сакиншинна хIасул дувайхту, ларсун кредит «Россельхозбанкрая» буллан бивкIунни нагь-нис дувайсса завод. Шикку вайннан цанна дакъа, хьунтIий дур цайми инсантурансса давугу.
Жувагу чIа учинну вайннан тIайлабацIу, дуллалимур бакIуйн дуккаву!
