Цимирагу шинъя ттул ва махъ-зуманив буттал шяравун, 1-мур ЦIувкIрав, чарабакъул биявай, гьантта- кIива бувну ялавай лагавай.

Зувирахъул шинал лажиндарай цIакь хьусса, гьаршинах отпуск буттал шяраву гьан бувайсса аьдатрайн хаин хьуну. Гьашинурив на кьянкьану хIукму бувссия цIу лаган дуван ттулла аьдат.

---

ПатIимат Рамазанова
Цалчинма-цалчин, шяраву ттун тамаша бивзмургу му бия, гъараллу чIярушиврул лу­хха- ххиттул дирзун най дикIайсса шяраву ххиттул асарвагу ба­къая, гьалаксса гъаралуннил бяххан бувну, кIичIирттаву щама бакъа ливчIун бакъая, чунмай бачирчагу ххюл, щама бия, шяравалу щаллара марцI дурккун, ца ххуйну чIалай дия.

Мяйжан­ссар, чIяруми шяраваллайн дирсса азар жулмунийнгу дирну дия: ччи- ччинийх, яъни шяраваллил кIичIирттавух итабавкьу­сса гъаттарал хъуттал бакIурду бу-буний кьавкьун, бярайн бу­ккавай бия. Жул заманнай хIатти ция гукун гъаттара шяравух ягу дуцантIисса лухччайх итабакьин! КъабучIиссия. Къадагъа цIакьссия. КъабучIиссия чапалсса, учиннуча, янна шюршусса щиннагу кIичIиравун экьирутIин. Пар-партIи бувну чIатулттах кIичIирттугу башай­ссия, чIаххурал эяллавун къадирчуну, ччюркгу дичин аьркинсса кIанттурдавун дичайссия.

Гъараллу чIярушиву багьана хьу­сса хайр цамургу бия: щин сайки най къадикIайсса кIанттавух чяр-чяртIий най дия мадарасса ратIру. КкурчIавва къатта бусса жуяту арх бакъасса кьуллалийнгу щин дурцуну дия. УрчIцIалла шин шавайсса ниттил, ва хавар баяйхту, «хIайп,ттунна му коммунизм къаккарксса!» тIива. Буниялттунгу, жу щинал хъирив лагай­ссияв шяраваллил зума- къирагъирттайсса кьуллардайн. Гъаттара хIачIан бувангу — ми­ккунма. Кувни щинал хъирив бувкIцириннал кьюкьа диялсса дуну, яржа бияннин ялугьлан багьайва, микIгулачIлай. Ялув тту­ккун, Ваччав, СсурхIив лавгссияв щинал хъирив тIий, ни­ттилгу дяъви бувайссия. ИчIуннай щин дуцаву макIравагу къаккаккан­сса ишну чIалай бия.
КIилчинмур ххаришивумур, шяраву мобилардал связь зий душаву бия. Гьашинунин дакъассия ЦIувкIрав связь, утти шяраваллил агьлу, иш багьни, кувннайн кув оьвтIий,мобильникирттая неъмат ласлай бия.

Дурая ЦIувкIрав ххалайн буккан чIун дучIан, амма шяраваллил агьулданун дулланмур чан дакъая. ХIатта бия дахьва нувщи бугьлагьиссагума. КIива- шанма зурул мутталий ххуйсса бакIлахъия хьунтIиссар, дукIугу, бугьан чIал хьурчагу, ххуйсса нувщи хьуна тIий бия. Хъинну кьурчIи бизлан бикIай, валлагь, шяраваллил агьлу курчIил хьуну бур тIисса хаварду. ЦIувкIул цIанихсса захIматчитал бур. Хъиривмур номерданий бусанна ххяллай, щамарал хъачIрайххаллилсса багъ бувсса Кьурбанхъал ХIа­саннуя ва Ажувхъал Аьишат­луя. ИчIаллилссагу, хъу-лух­ччинулссагу, ятту- гъаттарал­ссагу буллай аьдатсса хъами бур, зувинниха ливчусса шиннардий гьар кьини Ва­ччав даврийн заназисса ва Ваччату бувкIун мукьах гъаттарал­сса ва ичIаллилсса буллали­сса ттул яхIлувсса чIа­ххудуш Кисараннуя тIайла хьуну. .

МукIруссара: ЦIувкIрав мина дирхьуну бивкIссания, бюхъайвав на даврил бюхъу- тяхъалул махънин багьминнавугу махъва-махъ бикIан. Бутта дунияллия лавгун мукьах, мукьра шинал мутталий ужагърай, гьашину кунма, цачIун къабавтIсса жул кулпатрал хъунмур мурадвагу бия, гьай- гьай, ужагърай пуркIу буккан буваву. Ца ххираяхха жул ниттин гъунттуй нисирал буркив шахьлан ва жу ца ланжар­ттухун батIлан. Цаппара гьант­райсса шяравун нину дурцуну бувкIсса жугу буварду гъун­ттуй нисирал буркивгу, буварду бярал цIарай хIухчил ххункIгу. Ниттил кунна нюжмар хьхьурдай хъюву­сса цIарал къавтIилух дуаьрттугу дуварду. Июль- авгъуст зурдардий мадарасса шагьрулул агьлу батIай ЦIувкIрав. Яраппий, лахъисса лякъиннав ттул буттал шяраваллил тарих! Чан къахьуннав ужагъирттай пуркIу буккан буванмигу, дяркъусса ратIув кавс кьукьлай хIавз бувну, щинавун бучIлай, неъмат ласунмигу! Ттуяр ххуйну ттул дакIнивусса асарду ва щугълурду аьч бувантIиссар суратиртталгу.