Уттигъанну ГьунчIукьатIув хьунни цалчинсса гольф тIуркIулий буккаву. Ва тIуркIулий уттинин Дагъусттаннай бувкшиву къакIулли. ЖучIан гольф ларсун увкIунни Кьурбанаьли Ибрагьимов.
Ва пикри ванан ччянива хьуссия, амма аьркинсса кьай-кьуй Дагъусттаннай чуври, Аьрасатнал цайми шагьрурдай, улу Москавливгума лякъин хъанай дакъая. Ахиргу, Кьурбанаьлил уссил оьрчIан — Шамиллун Китайнаву ляркъуну, дучIан дурна гольфрал кьай-кьуй — сайки 2 барз лавгуна клюшкарду ва ттупру тиха бучIаннин. Цалчинсса буккаву дарду Хъахъиявсса кьаннай 2 азарда метралул лахъшиврийсса зунттуй. Шиккун гольфрай буккан бувкIунни Кьурбанаьли, Малик, МахIаммад, Назим, Тимур, Катя, Дина, Мариян, Тамари, Мукарама, Муслим, Аймисай, Наби, Жумяъ, Манап, Лариса, Лида, ХIамид. Цалчинсса гольфистурал хIурматран Дандамаев Манаплул ва Жумяълул ххуйсса хъамалушиннагу дурна.
Ва тIуркIу муксса хIаз бивзуннихха, уттигъанну ларчIсса гъаравухгума буклай буссияв Щуруй къурув Чару личай кьунттучIату байбивхьуну, КIулушав бияннин. Шикку гольфрай буккан бувкIун бия Кьурбанаьли бакIчину, ЦIаххуй, Амин, ХIасан, Жамалуттин, Нариман, Малик.
Утти ГьунчIукьатIув буссар сакин бувну гольф-клуб. Мунил Президентну, циняв рязину, увчIарду ва тIуркIу жучIанма бучIан бувсса Кьурбанаьли. МуначIа дуссар хасъсса лишангу. Бухьхьияра буклан гольфрай – рязийну личIантIиссару.
Малик Къушиев
