Вай лув кIицI лавгсса витаминнал хъунмасса хIаллай бурчу кIукIлуну, цIай-цIай тIий, нур лахълай, пперха тIий битайссар. Витамин К хIаласса косметикалул яруннил лувсса дурухлурду гьан дайссар, бургъил ччуччин бувсса бурчу цIулаган байссар.
Витамин К буссар дунгъузрал ттиликIраву (нюжмардий 1-2 касак канан аьркинссар), каландалуву, брокколилуву, щюлли хъюрувраву, помидордануву, нисвартуву, къавахъраву, зайтундалул, соелул аьгъушивруву (дуллалияра салатру вай маслагу дуртIуну), бананнаву, авокадолуву (нюжмардий 1-2 вайми продуктылуя личIину канакияра).
Витамин Е. Ва витамин хIаласса косметикалуву чара бакъа хьунабакьинтIиссар «омолаживающий» тIисса махъ. Е витаминдалул оь ххуйну нани бай­ссар, бургъил ультрафиолетрая бурчу буруччайссар. Бурчу токсинная марцI бай­ссар, лажиндарайсса жигдатIру дючIан дай­ссар. Витамин Е бу­ссар арахисраву, миндалдануву, пархтIутIуву (семечки). Ца къеп вай продуктылул гьа­ссар. ЧIикIунтIа, шагьнал лачIал аьгъу­шиву (кукурузное масло), ккирттарацIа марцI къабув­сса ппиринж, микIлачIун бувсса шпинат – вайннул салатру дай­ссар, нюжмардий 2-3-лла дукралувун дичайссар.
Витамин В3. Ва витаминдалул ятIул лагаву гьан дай­сар (покраснение), лажиндарал бурчу цIулаган байссар, буруччайссар бурчу бявкъу-гъили шаврия. Витамин В3 буссар гъаттарал, бюрчулил, дунгъузрал, оьрус ажарттул (индюшка) дикIуву, балугъраву (пачракъатлуву дагъ дувара урттущал нюжмардий 2-3-ла), хIуру нисираву, тартнакIливу, йогуртраву (100 г. гьантлун гьассар вай продуктылул), ккунуккирттаву (нюжмардий 2 ккунук кIюрххилссаннун канарча гьассар). КIучIалу (отруби) мюрш дурну дичияра тартнакIливун ягу йогуртравун, ца стакандалуйн ца чяйлул къуса хIисаврай.
Витамин С-рал буруччай­ссар бурчу тIинхьрая. Агарда лажиндарал бурчу кьавкьсса, кIяла лавгсса бухьурча, зун чара бакъа аьркинссар витамин С. Витамин С буссар цитрус ахъулссаннуву (апельсин, мандарин, лимон), турщисса гьивчуву, клюквалуву, лухIи смородиналуву, кивилуву, калиналуву, брусникалуву (1-2 ахъулсса гьантлун ягу 100 гр. хIаллил ахъулссаннул гьа­ссар). Дукияра вай ахъулсса дяхтта ссят 18 хьуннин, вайми продуктылуя личIину.
Чяйлун кIанай хIачIлачIияра хъанакIул щин (1/2 стакан хъанакIул термосравун дирчуну, ялун щаращисса щингу дуртIуну, дитияра 2 ссят­рай). Витамин С буссар накьлил урттуву-петрушкалуву, цIил бувсса каландалуву (вай канакияра гарнирданун кIанай).
Витамин А. Агарда бурчу кьавкьсса, ххарттасса, къабюв­чIусса бухьурча, зун чара бакъа аьркинссар витамин А, мунищала архIал яруннил лувсса лухIисса щаругу ва витаминдалул гьан байссар. Витамин А буссар гъаттарал ттиликIраву, ккунукраву (нюжмардий 2 ккунук), лагавриву ( 82,5% аьгъушиврул бусса лагаврил гьантлун дукан аьркинссар 10 гр.), чIикIунтIалуву, чимусуву, къуруву (нюжмардий 2-3-лла салат дан аьркинссар), балугърал аьгъу­шивруву (рыбий жир ласияра аптекрава, инструкциялийн бувну хIачIлачIияра).
ЦIуллуну битаннав.
Т. ХIажиева