Цимилгу мяйжанни жула лакку балайлуву тIимур: ци неъматру ккаклай, хъуни шагьрурдай бунугу, дакIру кIункIу тIун дикIай жула кюр­ттарайн – Лаккуйн.

Махъсса ппурттуву тIурча, дакI хъиннура ххари хъанан дикIай, Гъумуксса ххуй чулийннайсса да­хханашивуртту чIалай. Ми да­хханашивурттал сававчинугу ур Лакрал райондалул бакIчи Юсуп МахIаммадов. Ванахь учин ччай бура дакIнихтунусса барчаллагь.

Гъумук цIуллу-сагъну хъунигу хьуну, яла ххуйми учительтурая кIулшивугу, мяърипатгу ларсун, ца 60 шинал хьхьичI нагу лавгссара Гъумучату. Хъинну чIявусса буру жува Лакку Ватандалия ябувцун яхъанахъисса арсру-душру. Жу багъишла бити, аьзизсса улчай!

ДукIу лавгссияв Гъумукун, нава хъунма хьусса кIану ккаккан. Кув кIанттурду ттун бугума-къабувчIуна. Бивссияв хIатталлийнгу ттула гъанцириннал гьаттардийн икрам бан, алхIам буккин. Бивссияв оьрчIнийва дакIнил лавсъсса Ччярав-Щаращуйнгу.

Школалий дуклакисса чIумал жу физкультура дан лагайсса бивкIсса кIанттай полициялул хIаят дия. Ца жагьилсса полициялул зузала увкIун, зу микку машина цан бацIан барду кувкун, на учав: «Вияргу жагьилсса чIумал ва жул кIануяча, багъишла бити», — куну. «Инава на ба­гъишла ити, ттул нину», — куну, лавгуна жагьил.

Лавгссияв Хъун бярнил лагма сайр бувангу. Бярнил лагмахалу, дакьингу дурну, лайкьсса тагьарданийн дурцуну дия. Амма, махIатталсса иш, бигьалаган щябикIайсса цIуну був­сса скамейка бия щиллив гъагъари бувну. ХIайп, мукунсса «виричу» Гъумук яхьун! Дурмур лиллали­ссагурив бикIайсса?!
Махъсса шиннардий Гъумук дурмурдив дия ххишала дакъа дакI ххаришиврул дуцIин дуллалисса. Дулуннав, Юсуп, ви­хьхьун цIуллушиву цаннияр ца хьхьичIунсса, агьамсса мурад­ру щаллу буллансса! ВицIун кабакьлакьимигу чан къахьуннав тачIав!

Басират Рамазанова,
ЦIуминалийсса ЦIуссалак